Փաստ ինֆո

Լիբանանի կառավարությունն օգոստոսի 10-ին ամբողջ կազմով հրաժարական տվեց։ Խոսակցություններ կան, որ հրաժարական է ներկայացնելու նաև խորհրդարանը։ 

Լիբանանահայ լրագրող Համո Մոսկոֆյանը կարծում է՝ երկիրն այժմ քաղաքական դժվարին իրավիճակում է և այս ճնշումները երկիրը կարող են տանել ընդհուպ դեպի քաղաքացիական պատերազմ։ «Փաստինֆո»-ի հետ զրույցում Համո Մոսկոֆյանն ասաց, որ այս ամենից հատկապես տուժեց քրիստոնյա համայնքը.

«Մինչև հիմա ժողովրդի համոզմունքն այն է, որ իսրայելական ինքնաթիռները խփեցին ու դրա համար պայթեց։ Իսկ այս լարվածության պատճառով երկիրը կարող է գնալ քաղաքացիական պատերազմի։ Դա այն է, ինչ ցանկանում է տեսնել Իսրայելը։ Այսինքն` վերացնել այս երկիրը։ Չգիտենք՝ ինչ է լինելու սրա վերջը։ Այս կարգի իրավիճակ չէր ստեղծվել, որ ամբողջ քաղաքի 2/3-ը քարուքանդ լինի այնպես, որ քանի տարի պետք կլինի, որ վերականգնվի, քանի՞ հարյուր միլիարդ է պետք, որ այս բոլորը ոտքի կանգնի»,-ասաց լիբանանահայ լրագրողը՝ նկատելով, որ այսօր հայերն ամենաթույլ օղակն են։ Համո Մոսկոֆյանն ընդգծեց՝ հայկական գաղթօջախը պետական հովանավորչության կարիք ունի.

«Ո՞վ է կանգնելու այս գաղթօջախի կողքին, պառակտված Հայաստա՞նը, թե՞ Սփյուռքի պառակտված կուսակցությունները։ Հայկական գաղթօջախներին տեր չեղան, անտեր վիճակում ենք։ Մի հայ կուսակցապետ չի բարեհաճել զանգել ու իմանալ՝ ինչ վիճակում է լիբանանահայությունը։ Հիմա այստեղ շատ մարդիկ կան, որ ցանկանում են Հայաստան գնալ թեկուզ բուժվելու։ Մեծ մասը շվարած է, չգիտի՝ ինչ պետք է անի, որովհետև բոլորը սպասում են՝ ինչ պետք է լինի»,-ասաց Համո Մոսկոֆյանը։

Վերջինս նույնպես տուժել է պայթյունից։ Ստացել է մարմնական վնասվածքներ, բացի այդ վնասվել է նաև բնակարանը։ Լրագրողն ասում է, որ մեծ մասը չգիտեն, թե ինչպես պետք է կառուցեն այդ տները. «3000 լիբանանցի առանց բնակարանի է մնացել։ Բարեգործական ընկերություններ, միջազգային կազմակերպություններ կան, որ համարներ են տրամադրել՝ մարդիկ դիմեն իրենց։ Բայց եթե նորից վերանորոգեն իրենց տները, ի՞նչ կլինի, որովհետև Լիբանանի քաղաքական վիճակը չի կարգավորվել։ Մեր շարքի բոլոր տները քարուքանդ են եղել, պատուհաններ չկան, որ մի բան չկա։ Ժողովրդի մի մասն իրենց հարազատների մոտ է բնակվում, ով էլ գումար ունի գնում է էժան հյուրանոցներ։ Այդ տները վերականգնելը տասնյակ հազարավոր դոլարների պատմություն է։ Եթե դրսից, միջազգային կազմակերպություններից, ԵՄ-ից օգնություններ չլինեն, այս բնակարաններն անհնար է՝ կառուցվեն։ Շենքեր կան՝ հիմքից խախտվել են»,-նշեց մեր հայրենակիցը։

Նրա խոսքով այս պահի դրությամբ փողոցներում ցցուն քաղաքական երևույթներ չկան։ Ամենուր ոստիկանությունն է, քանի որ ավազակների խմբեր նույնպես սկսել են շրջել։ Քաղաքում համատարած ողբերգություն է։

Հեղինակ՝ Հասմիկ Կոշկարյան

Աղբյուր` Փաստինֆո