Փաստ ինֆո

«Արտակարգ դրությունը երկարացնելու որևէ պատճառ չկա, բացի քաղաքականից»,-Լրագրողների հետ հանդիպմանը հայտարարեց Հայաստանի մարդու իրավունքների առաջին պաշտպան, «Ընդդեմ իրավական կամայականությունների» ՀԿ նախագահ Լարիսա Ալավերդյանը:

Ըստ նրա՝ ՀՀ-ում համավարակի դեմ պայքար ոչ տարվել է, ոչ էլ տարվում է: Անդրադառնալով մեր հասարակության շրջանում համավարակի տարածվածությանը՝ Լարիսա Ալավերդյանը նշեց. «Համոզված եմ, որ դա բնական զարգացումն է պանդեմիայի: Պետական մակարդակով բացի ձևական գործողություններից, որոնք գուցե չլվացվող, ձեռքերը չլվացող մարդկանց համար կարևոր են եղել՝ դիմակներ կրելը, ուրիշ ոչինչ չի արվել: Բայց դրանց ազդեցությունը պանդեմիայի վրա չնչին է: Այն բոլոր միջոցները, որոնք պետք է արվեին, ինչպես արել է Վրաստանը, Վիետնամը, Նոր Զելանդիան կամ Շվեդիան, չեն արվել: Ես թվերին հավատում եմ ոչ թե նրա համար, որ դրանք ճշմարիտ են, այլ արդեն իմ ծանոթների մեջ էլ ունենք հիվանդներ»:

Ըստ Լարիսա Ալավերդյանի՝ ՀՀ առողջապահության նախարարությունը «ձեռքերը լվացել է»:
«Առողջապահության նախարարությունն, ինչպես ասում են, իրոք, ձեռքերը լվացել է, որ չանի ոչինչ, իրեն հեռու պահի: Դա հստակ է: Երևի ավելի շատ է ձեռքերը լվացել, քան հասարակ քաղաքացին: Համոզված եմ, որ այն, ինչ կա հետևում, պիտի ուսումնասիրեն, վեր հանեն»:
Լարիսա Ալավերդյանը հետաքրքրված է ՝ ինչո՞ւ են հենց այս իշխանությունները սարսափում բազմամարդ միջոցառումներից:

«Դա ինձ հիշեցնում է ցարական կառավարությունը: Լենինը գիտեր, որ չի կարելի այդքան մեղմ վերաբերմունք ունենալ նրանց նկատմամբ, որոնք դեմ են ցարին: Նա մի խնդիր էր դրել՝ ոչնչացնել ցարին ու նրա ընտանիքին: Նիկոլ Փաշինյանը գիտի՝ ինչպես են եկել իշխանության, և այդ սարսափը, որ նույն ձևով կարող են ուրիշները գալ, բերում է դրան: Խայտառակություն է, որ երեք միլիոնանոց Հայաստանը կես տարի հայտնվել է արտակարգ իրավիճակի մեջ: Զուտ պանդեմիայի ու վիրուսի բնականոն զարգացումով մենք Աստծո օգնությամբ կմնանք կայուն կիսավիրուսային իրավիճակի մեջ»:

Աղբյուր` Փաստինֆո