Փաստ ինֆո

Կասկած չունեմ, որ մենք ականատես ենք լինելու քաղաքական շատ լուրջ միավորումների, որի արդյունքում ընդդիմադիր դաշտը կորոշի՝ ով է առաջնորդելու Հայաստանը ապագա մի քանի տարիներին։ Այս մասին լրագրողների հետ հանդիպմանն ասաց «Հայաստան» համահայկական հիմնադրամի նախկին տնօրեն Արա Վարդանյանը՝ խոսելով երկրի ներքաղաքական իրավիճակի մասին։

«Երկու տարի առաջ տեղի ունեցածը մի շատ կարևոր վնաս հասցրեց Հայաստանին, դա այն է, որ ՀՀ քաղաքացիների գերակշիռ մասը կարծեց, որ կարող է լինել Հայաստանի Հանրապետության վարչապետ։ Սա իրականության մեջ վարչապետի ինստիտուտի նշաձողի շատ լուրջ իջեցում է։ Սա լուրջ վերաբերմունք չէ Հայաստանի և հայաստանցիների նկատմամբ, քանի որ պաշտոնին ձգտելը երկիրն ավելի լավը չի դարձնի, ինչում արդեն համոզվել ենք»,- ասաց նա։

Ըստ նրա՝ նույնիսկ քաղաքական դաշտում գրեթե բոլոր խաղացողներին թվաց, որ իրենցից յուրաքանչյուրն էլ կարող է լինել վարչապետ։ Անցած երկու տարին մենք տեսնում էինք, որ տարբեր քաղաքական կուսակցություններ, անհատներ, նախաձեռնության անդամներ, կազմակերպությունների ղեկավարներ իրենց վրա էին քաշում վերմակը, որ իրենք կարող են լինել վարչապետ: Հիմա եկել է մի հանգրվան, երբ ըստ իս՝ բոլորն էլ հասկացել են, որ վարչապետն ամեն մեկը չէ, որ կարող է լինել: Չկա Հայաստանում առանձին վերցված որևէ ուժ, որը կարող է այս իշխանությանը ստիպել հեռանալ, դա պետք է անել համախմբված, բոլորով»։

Արա Վարդանյանը կարծում է՝ եկել է ժամանակը համախմբվելու, և այս երկու տարին մեծ ժամանակ էր հասկանալու՝ ինչ իրավական պրոցեսներ են տեղի ունենում Հայաստանում, ինչ քաղաքական պրոցեսներ են ընթանում։

«Կասկած չունեմ, որ մենք ականատես ենք լինելու քաղաքական շատ լուրջ միավորումների, որի արդյունքում ընդդիմադիր դաշտը կորոշի՝ ով է առաջնորդելու Հայաստանը ապագա մի քանի տարիներին»,- ասաց Արա Վարդանյանը:

Աղբյուր` Փաստինֆո