Փաստ ինֆո

ԱԺ փոխնախագահ Վահե Էնֆիաջյանի մասնակցությամբ զենքի գործադրմամբ տեղի ունեցած միջադեպի առթիվ հարուցված քրեական գործն արդեն ՀՔԾ-ում է։ 

«Փաստինֆո»-ի հարցմանն ի պատասխան ՀՔԾ-ից հայտնեցին, որ ստացել են Երևանի Ֆրիկի փողոցում զենքի գործադրմամբ տեղի ունեցած միջադեպի առթիվ ՀՀ Քրեական օրենսգրքի 258-րդ հոդվածի 4-րդ մասի՝ զենքի գործադրմամբ խուլիգանության հատկանիշներով հարուցված քրեական գործը։

Ավելի վաղ հայտնել ենք, որ Կենտրոնական բաժնում օպերատիվ տվյալների հիման վրա նախապատրաստված նյութերով տվյալներ են ձեռք բերվել այն մասին, որ 2020թ. օգոստոսի 4-ին՝ ժամը 02։00-ի սահմաններում, Երևան քաղաքի Ֆրիկի 15 հասցեի մոտակայքում մի խումբ անձինք, կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով հասարակության նկատմամբ, վիճաբանել են միմյանց հետ, միմյանց հասցեին հնչեցրել հայհոյանքներ, որի ընթացքում վիճաբանության մասնակիցներից՝ դեռևս չպարզված անձը, իր մոտ եղած ատրճանակից արձակել է կրակոց։ Դեպքի առթիվ հարուցվել է քրեական գործ՝ ՀՀ քրեական օրենսգրքի 258-րդ հոդվածի 4-րդ մասով։

«Նկատի ունենալով, որ դեպքն առերևույթ առնչվում է բարձրաստիճան պաշտոնատար անձի՝ ՀՀ գլխավոր դատախազությունը քրեական գործը քննչական ենթակայության կարգով ուղարկել է ՀՀ ՀՔԾ՝ նախաքննություն կատարելու համար»,- ավելի վաղ «Փաստինֆո»-ի հետ զրույցում հայտնել են դատախազությունից։
Մամուլում շրջանառվող տեղեկություններով՝ ատրճանակով կրակոց է արձակել ԱԺ փոխնախագահ Վահե Էնֆիաջյանը, որի անունը, թեեւ պաշտոնական մարմինները չեն նշում, բայց քրգործը ՀՔԾ ուղարկելը՝ բարձրաստիճան պաշտոնյայի ենթադրյալ առնչության պատճառաբանությամբ, վկայում է, որ գործը հենց նրան է վերաբերում։ Վահե Էնֆիաջյանը հերքել է զենքի գործադրման մասին տեղեկությունները:

Աղբյուր` Փաստինֆո