Փաստ ինֆո

Արմեն Գևորգյանի փաստաբանը դատական կարգով պահանջում է քրեական գործ հարուցել նրան Հայաստանի սահմանը հատելն արգելելու դեպքի առթիվ։ «Փաստինֆո»-ի հաղորդմամբ քրեական գործի հարուցումը մերժելու քննիչի որոշման դեմ փաստաբանի ներկայացրած բողոքը մակագրվել է Երևանի ընդհանուր իրավասության դատարանի դատավոր Վահե Միսակյանին, որի նախագահությամբ նախատեսված նիստը հետաձգվեց։

Պարզվեց՝ կողմերը չեն ստացել գործի նյութերը և ժամանակ էր անհրաժեշտ գործի նյութերին ծանոթանալու համար։ Արմեն Գևորգյանի փաստաբան Էրիկ Ալեքսանյանը «Փաստինֆո»-ի հետ զրույցում ասաց, որ դիմել էր ՀՔԾ՝ նախապատրաստված նյութերը ստանալու և դրանց ծանոթանալու, հարկ եղած դեպքում բողոքը լրացնելու համար։ Նրա խոսքով՝ դեռևս պատասխան չի ստացել ՀՔԾ-ից։

Հաջորդ դատական նիստը նշանակվել է սեպտեմբերի 30–ին՝ ժամը 16 ։00-ին։

Ավելի վաղ տեղեկացրել ենք, որ Արմեն Գևորգյանին ՀՀ սահմանը հատելը չթույլատրելու կապակցությամբ փաստաբան Էրիկ Ալեքսանյանը ՀՀ գլխավոր դատախազին հաղորդում էր ներկայացրել, որով խնդրել էր իրավական գնահատականի արժանացնել ՀՀ ոստիկանության քրեական հետախուզության գլխավոր վարչության ծառայողների գործողությունները, իսկ քրեական գործ հարուցելու առիթի օրինականության և հիմքերի բավարար լինելու դեպքում՝ հարուցել քրեական գործ: Սակայն ՀՀ գլխավոր դատախազությունը այնուհետև՝ նաև առաջին ատյանի դատարանը գտել էին, որ Ալեքսանյանի կողմից ներկայացված հաղորդումը վերացական է և չի պարունակում կոնկրետ տվյալներ՝ հանցագործության հատկանիշների մասին:

Երևանի ընդհանուր իրավասության դատարանի որոշման դեմ փաստաբանը վերաքննիչ բողոք էր ներկայացրել, որը 2020թ փետրվարի 18-ին բավարարվել էր՝ բեկանելով Երևանի ընդհանուր իրավասության դատարանի որոշումը՝ վարույթն իրականացնող մարմնին պարտավորեցնելով վերացնել Արմեն Գևորգյանի իրավունքների խախտումը։ ՀՀ գլխավոր դատախազ Արթուր Դավթյանը Վերաքննիչ դատարանի որոշման դեմ վճռաբեկ բողոք էր ներկայացրել, սակայն Վճռաբեկ դատարանը մերժել է վարույթ ընդունել բողոքը, ինչը նշանակում է, որ Վերաքննիչ դատարանի որոշումը մտել է օրինական ուժի մեջ և այդպիսով ՀՔԾ-ն պարտավոր էր նյութեր նախապատրաստել՝ պարզելու, թե արդյո՞ք ՀՀ նախկին փոխվարչապետ Արմեն Գևորգյանին՝ սահմանը հատելն արգելած ոստիկանության ծառայողների գործողություններում առկա են հանցագործության հատկանիշներ, թե ոչ։ ՀՔԾ քննիչը որոշում է կայացրել քրեական գործի հարուցումը մերժելու մասին՝պատճառաբանելով, թե ՀՀ ոստիկանությունը,, իբր իրավացիորեն ղեկավարվել է կառավարության որոշմամբ, ըստ որի՝ անձի ազատ տեղաշարժի վերաբերյալ համակարգ մուտքագրված սահմանափակումը կարող է հանվել բացառապես այն դեպքում, երբ առկա է վարույթն իրականացնող մարմնի որոշումը՝ խափանման միջոցը վերացնելու մասին։

Էրիկ Ալեքսանյանը «Փաստինֆո»-ի հետ զրույցում ընդգծեց, որ շարունակում են պնդել իրենց դիրքորոշումն առ այն, որ ոստիկանությունը կատարել է ոչ իրավաչափ գործողություններ,որտեղ առերևույթ առկա են պաշտոնեական հանցագործության հատկանիշներ։

«Օգտագործելու ենք մեր իրավասության շրջանակներում ամբողջ գործիքակազմը, որ հասնենք նրան, որ այն անձինք, ովքեր գործել են ոչ իրավաչափ և նրանց գործողություններում առկա է քրեական տարր, ենթարկվեն քրեական պատասխանատվության»,- ասաց Ալեքսանյանը։

Ինչ վերաբերում է առանց խափանման միջոցի վերացման սահմանը հատելու թույլտվության վերաբերյալ ձևավորված պրակտիկային, փաստաբանն ընդգծեց, որ քրեական հետապնդման մարմինները շատ լավ գիտեն, որ ՀՀ-ում կա ձևավորված պրակտիկա, նույնիսկ չհեռանալու մասին ստորագրություն խափանման միջոցի դեպքում, վարույթն իրականացնող մարմնի թույլտվության դեպքում ոստիկանությունը որևէ խոչընդոտ չի առաջացրել սահմանը հատելու հետ կապված, քանի որ ՀՀ քրեական դատավարության օրենսգրքով սահմանված է, որ կասկածյալը կամ մեղադրյալը, ում նկատմամբ ընտրված է ստորագրությունը չհեռանալու մասին խափանման միջոց, կարող է ժամանակավորապես մեկնել այլ տեղանք կամ փոխել իր բնակության վայրը։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո