Փաստ ինֆո

Գործողություններ մշակում ենք, բայց դրանք այս պահին հանրային չեն։ Սպասենք այդ հայտարարություններին։ Այս մասին «Փաստինֆո»-ի հետ զրույցում հայտնեց Գնդեվազ համայնքի բնակիչ, ակտիվիստ Թեհմինե Ենոքյանը՝ անդրադառնալով Վագոն-տնակների տեղափոխումից հետո մշակվող քայլերին։

«Լիդիան Արմենիա»-ի վագոն-տնակները մոտ 25-30 մետր տեղափոխվել են, բայց Թեհմինեն մեկ անգամ էլ փաստում է, որ դրանով չի պայմանավորված տեղացիների պայքարը։

«Հիմա մեքենաներով ճանապարհը փակել են և չեն թողնում, որ ընկերության շինարարական տեխնիկան անցնի և աշխատի։ Ներկա պահին ընկերությունը չի կարող աշխատել, որովհետև տեղացիները կրկին շրջափակել են՝ անկախ նրանից իրենց տնակները տարածքում են թե ոչ, մարդիկ իրենց մեքենաներով են դա արել ու մեկ անգամ չէ, որ այդ գործողությունը իրականացնում են», - նշեց նա։

Ամուլսարի՝ սար մնալու պահանջ ներկայացնող ակտիվիստների երկրորդ պահանջն այժմ իրավական գործընթացների փուլում է։ «Իմ քայլը» խմբակցության երկու պատգամավոր՝ Սոֆիա Հովսեփյանը և Գայանե Աբրահամյանը, Անկախ պատգամավոր Արման Բաբաջանյանը, և ԼՀԿ պատգամավոր Անի Սամսոնյանն աշխատում են այն ուղղությամբ, որպեսզի հասկանան, թե պահնորդական ընկերությունն ինչ օրենքներ է խախտել։

«Իրենք էլ վստահ են, որ օրենքներ խախտվել են, հարցումներ են անում ոստիկանություն, ճշտումներ անում, պահնորդական խմբի սադրանքների մասին հավաքագրվում են տվյալներ և այս ամբողջը պետք է նախաքննության փուլով ներկայացվի ոստիկանություն և ոստիկանությունն էլ է այդ գործողություններն իրականացնում, որովհետև իրենց նկատմամբ եղել է բռնության գործողություն»։

Ակտիվիստների գլխավոր պահանջը ՇՄԱԳ-ը ուժը կորցրած ճանաչելն է։ Ասում են՝ կառավարությունը պետք է համարձակություն ունենա, ասի, որ հարցը կլուծեն այսքան ժամանակում կամ կասի հարցը հիմա են լուծում։ Բավարար չափով ժամանակ տվել են կառավարությանը, որպեսզի դիրքորոշումն արտահայտի, ինչը մինչև հիմա չի արվել։

«Մենք շատ տարբեր գործողություններ ենք անում, որոնք որ պայմանավորված չեն միայն ճանապարհ փակելով, ակցիաներ անելով։ Մենք նաև իրավական և միջազգային մակարդակում ենք գործողություններ իրականացնում և դրանցից մեկն էլ այն է, որ բողոք ենք ներկայացրել ՎԶԵԲ-ի Օմբուդսմենի գրասենյակ, որ Լիդիանի ֆինասավորող կառույցն է և մենք այս ընկերությանը պարտադրելու ենք օրենքի դաշտ գա և բարձր միջազգային ստանդարտների անվան տակ գործած կառույցի շղարշը ի չիք ենք դարձնելու։ Այսօրվա դրությամբ մենք ունենք հրապարակման ենթակա տեղեկատվություն՝ ՎԶԵԲ-ը չունի  ֆինանսական հետաքրքրություն, որի մասին մեզ տեղեկացրել է Օմբուդսմենի գրասենյակը»։

ՎԶԵԲ-ը դուրս է գալիս Լիդիանի ֆինասնական կառույցի հովանավորյալի կարգավիճակից և սա պաշտոնական պատասխան է, որը պայքարող անձանց օգնելու է հետագայում կառավարության հետ բանակցություններ վարելուց և սրանով կառավարության նկատմամբ ճնշումներն են թուլացնելու, գուցե և չեզոքացնելու։

«Սա շատ կարևոր արձանագրում է։ Կարելի է ասել ևս մեկ նվաճում է միջազգային հարթակում, ՎԶԵԲ-ը որ դուրս է գալիս, ընկերության սնանկության հետ է կապված, բայց դա չի նշանակում, որ գրասենյակը մեր բողոքը տարբեր կետերով են չի քննելու։ Գնդեվազի և Ջերմուկի բնակիչները դիմումը պետք է քննեն։ Քննելու է, մի բան էլ ավել՝ ՎԶԵԲ-ն է հիմա հետաքրքրված Հայաստանում այս ընկերության ապօրինություններով։ Լիդիանը խաբել է նաև իր միջազգային ներդնողներին։ Սա խայտառակություն է և պետք է հաշվի առնել, որ հենց Վերակառուցման զարգացման եվրոպական բանկը ինքն է հետաքրքրված այս գործընթացով, ուզում է բացահայտվի իրեն խաբած ընկերության գործունեությունը Հայաստանում»։

Թեհմինեն տեղեկացրեց, որ առայժմ կարիք չկա ժամկետներով խոսելու, նման պահանջ ժամանակային առումով չունեն, չնայած ասում են՝ Կառավարչությունը լավ կաներ այս հարցը շատ շուտ լուծեր, որովհետև այլևս լռելու ժամանակն անցել է, պետք է դիրքորոշում արտահայտեն։ Այլ տարբերակ չկա։

Աղբյուր` Փաստինֆո