Փաստ ինֆո

«Օգոստոսի 4-ին Ամուլսարում Լիդիան ընկերության վարձած խմբավորումն ինքնակամ տեղահանել է Ամուլսարի պահապանների տնակներն ու նույն տեղում՝ Ջերմուկ մայրուղու ճամփեզրին, տեղադրել իր տնակները« Հայտնում են Հայկական Բնապահպանական ճակատ կամավորական քաղաքացիական նախաձեռնությունից։

Նախաձեռնությունը հայտարարությունով իշեցնում է, որ երկու տարի անընդմեջ Ջերմուկի ու Գնդեվազի բնակիչները պահպանել են Ամուլսարը հանքարդյունաբերական ավերիչ ծրագրից՝ հերթապահելով դեպի Ամուլսար տանող ճանապարհներին և ապաստանել են այդ տնակներում։ Երեք դիմադրական կետերում էլ տնակները տեղադրված են ավտոմայրուղու եզրին։

«Ամիսներ շարունակ Լիդիանը լրատվամիջոցներով, դատական համակարգին դիմելով և իրեն հասանելի այլ միջոցներով պնդում է, թե Ամուլսարի պահապանները ներխուժել են իր սեփականություն հանդիսացող տարածք և պետք է դուրս բերվեն այնտեղից: Նույն պնդումն արդեն որերորդ անգամ արել են նաև երեկվա ապօրինությունն արդարացնելու համար»։

Նախաձեռնությունից հայտնում են, որ ՀՀ Ոստիկանությունը, որն ամիսներ առաջ պաշտոնական գրություն է տրամադրել այն մասին, որ Ամուլսարի պահապանների տնակները չեն գտնվում Լիդիանի սեփականություն հանդիսացող տարածքում, որ տարածքում ներխուժում առկա չէ, որ կատարված գեոդեզիական չափումները վկայում են, որ մայրուղու եզերքի կոորդինատները, որոնց վրա տեղադրված են եղել պահապանների տնակները, Լիդիան Արմենիա ընկերության տարածքը չեն համարվում՝ կից ներկայացնելով լուսանկարներ։

«Լիդիանը կրկին սանտիմետրեր է հաշվել տվել և պետական սեփականություն հանդիսացող ավտոճանապարհի պաշտպանվող եզրն արձանագրել է տվել իբրև իր սեփական տարածք, որն էլ վկայակոչելով իրագործել է օգոստոսի 4-ի հակաիրավական գործողությունները»։
Բնապահպանները մեջբերել են ՀՀ հողային օրենսգրքի 17-րդ հոդվածը, ՀՀ հողային օրենսգրքի 60-րդ հոդվածը և «Ավտոմոբիլային ճանապարհների մասին» ՀՀ օրենքի 2-րդ հոդվածը։

«Եթե Ջերմուկի մայրուղու ճամփեզրը հանդիսացող հողերն ինչ-որ կերպ հայտնվել են Լիդիանի սեփականության ներքո, ապա դա ապօրինի է կատարվել. պետք է պարզել, թե ո՞ր պաշտոնյաներն են արել այս գործարքը, ու նրանք պետք է պատասխանատվության ենթարկվեն, իսկ հողերը պետք է վերադարձվեն հանրային նշանակության: Նորից ենք շեշտում Ամուլսարի պաշտպանությունը հանրային շահ է հետապնդում, իրականացվում է հանրային կոլեկտիվ ջանքով, ուստի ճամփեզրի գործածումը Ամուլսարի պահապանների կողմից արդարացված է, իսկ զավթումը Լիդիանի կողմից՝ ապօրինի»,- ասված է հայտարարությունում։

Աղբյուր` Փաստինֆո