Փաստ ինֆո

Բեյրութում տեղի ունեցած պայթյունի որպես պատճառ՝ շատերը ահաբեկչության վարկածն են առաջ քաշում։ Լիբանանից «Զարթօնք» օրաթերթի գլխավոր խմբագիր Սևակ Հակոբյանը «Փաստինֆո»-ին հայտնեց, որ պետք է սահմանել ինչ ասել է ահաբեկչություն՝ թշնամական ռմբակոծություն է, թե ոչ, որը քննարկվում է, բայց որպես հավանական տարբերակ չի ընդունվում։ 

«Վարկած կա, որ իսրայելյան օդանավն է ռումբ արձակել և գիտեր, որ քիմիական նյութեր են պահվում այդտեղ, սակայն իսրայելական կողմը հերքեց այս լուրը։ Նախագահ Թրամփն էլ հայտարարեց, որ ռմբակոծում է եղել և ոչ թե պայթյուն։ Կա վարկած, որ անփութության արդյունք էր, որը մտածելու տեղիք է տալիս։ Այս վարկածը ավելի է քննարկվում։ Մասնագետները, որ պայթյունի նկարները ուսումնասիրում են՝ սնկանման ծուխը տեսնելով, ավելի այդ կողմ է գնում, որ պահեստանոցում անմիջական փոքր հրդեհ է եղել, որը չկարողանալով վնասազերծել, պահեստ է հասել։ Չմոռանանք, որ այն տարածաշրջանում ենք ապրում, որ լուրերը և վարկածները միշտ չէ, որ ճիշտ կարող են լինել կամ հրապարակվել»։

1974 թվականից ի վեր քաղաքական սպանություններ են եղել և ոչ մի սպանություն մինչև օրս չի բացահայտվել ՝ 45 տարի է անցել։ Միակ բանը, որ բացահայտման ճամփան է բռնել, նախկին վարչապետի սպանության գործն էր, որ միջազգային դատարանում է քննվում։ Սևակ Հակոբյանը պատմական ակնարկով հիշեցրեց, որ նույնիսկ միջազգային դատարանն արդեն 15 տարի քննում է գործը։
«Օգոստոսի 8-ին էր հայտարարելու, հիմա էլ 10 օրով հետաձգեցին, որի մասին կարելի է որոշ մեկնաբանություն անել։ Նույնիսկ միջազգային դատարանը՝ 15 տարի է աշխատում, բացահայտելու համար։ Հետևաբար` այո, մութ մնացող բաներ պետք է լինեն պայթյունի գործով։ Անշուշտ, այս պարագայում առկա է այն, որ ամեն մարդ կարող է տարբեր կերպ մեկնաբանել։ Գաղտնիք չէ, որ Լիբանանում քաղաքական և տնտեսական ճգնաժամ է, այս բոլոր պատահականությունները, որ կատարվում են՝ շատ զուգադիպություն է։ Բայց այս ամբողջ ճգնաժամի, արևմտյան ճնշումների մեջ այս պայթյունը, զուգադիպություն կարող է լինել։ Միջազգային վճիռը մոտ էր, որը հետաձգվեց. երևի վճիռը ինչ-որ ձև «պայթյուն»-ի պատճառ է։ Ամբողջ խաղը՝ այս պայթյունի վարկածները մի կողմ դրած, քաղաքական է, տնտեսական ճգնաժամը ևս քաղաքական է, տարածաշրջանում Իրան-ԱՄՆ քաշքշուքների ազդեցությունը ևս կա, Իրանի ուժը բավական տարածվում է տարածաշրջանում և քանի որ մերձեցում չկա հարաբերություններում, այս ճգնաժամը պետք է շարունակվի և նման «պայթյուններ» պետք է միշտ գտնվեն։ Լիբանանի թնջուկի լուծումը լիբանանյան չէ, տարածաշրջանային էլ չէ՝ միջազգային է»։

«Զարթօնք» օրաթերթի գլխավոր խմբագիրը խոսել է նաև թուրք–լիբանանյան հարաբերություններիր մասին և նկատել․ Բեյրութին օգնելու Թուրքայի առաջարկը ամենավտանգավորն է Լիբանանի համար։

«Թուրքիան էլ ներգրավված է այս պատմության մեջ, առիթավորվել է իր ուժերը տարածաշրջանում տարածելու ախորժակով, ինչպես կատարվում է Հայաստանի հետ։ Լիբանանի մեջ զինվորական միջամտություն Թուրքիան չունի, բայց մարդասիրական պիտակի տակ Թուրքիան մխրճվել է Լիբանան՝ եղբայրական օգնություն տալու համար, մանավանդ հիմա՝ աղետից հետո։ Չմոռանանք, որ Լիբանանը և տարածաշրջանը Օսմանյան կայսրության մաս են կազմել և ընտանիքներ կան, որոնք Լիբանանում են։ Նրանց օգնելու, նվիրատվությունների ֆոնին ազդեցություն ունի այստեղ։ Թուրքիան հարևան երկրում ու հյուսիսային Աֆրիկայում զինվորականներ ունի,իսկ հիմա նման իրավիճակները Թուրքիայի համար հարմար առիթ են մարդասիրական քողի տակ հետապնդած նպատակներն իրականացնելու»։

Աղբյուր` Փաստինֆո