Փաստ ինֆո

«Մեկ տարուց ավել է, Ազգային Անվտանգության Ծառայությունում որդուս՝ Սամվելի նկատմամբ հետապնդումները չեն դադարում։ Ամբողջությամբ ստուգել են նրա ԱԱԾ-ում ծառայած հինգ տարիները, բայց որևէ թերացում չեն հայտնաբերել։ Տղաս արդեն իմ խորհրդով դիմում է գրել, բայց մեկ շաբաթ է այն մակագրված չէ, թեև, սա ոչինչ չի ասում, միևնույն է ստորագրվելու է,- «Փաստինֆո»-ի հետ զրույցում այս մասին հայտնում է «Ազգային անվտանգություն» կուսակցության նախագահ Գառնիկ Իսագուլյանը և հավելում, -նախնական շրջանում փորձեցին պարզապես համոզել նրան, որ դուրս գա համակարգից, սակայն ինքն ասաց, որ ծառայում է հայրենիքին և իր առջև նման խնդիր այս պահին չի դրել։ 

«Երբ եկավ Քյարամյանը, համակարգի բարձրաստիճան ծառայողներից մեկի միջոցով Սամվելին տեղեկացրին, որ կա Նիկոլ Փաշինյանի հանձնարականը՝ ինչ գնով ուզում է լինի ազատվել իմ տղայից։ Պարզվում է, եթե դու ընդդիմադիր հայացքներ ունես, ուրեմն քո զավակները հայրենիքն ծառայելու իրավունք չունեն։ Տղայիս նկատմամբ այս հետապնդումները միանշանակ պայմանավորված են իմ քաղաքական հայացքներով։ Ես կարծում եմ, որ ապագայում իրեն հետապնդողներից շատ շատերը կդատապարտվեն պետական դավաճանության մեջ։ Ոլորտի բարձրաստիճան ծառայողները նրան խորհուրդ տվեցին դուրս գալ համակարգից, թե չէ մի բան կսարքեն։ Ի վերջո, ես էլ հասկացա, որ մենք գործ ունենք մի իշխանության հետ, որ ամեն ինչի ընդունակ է ու ինքս էլ որդուս խորհուրդ տվեցի դուրս գալ համակարգից, որովհետև չեմ ուզում երիտասարդ տղայիս կյանքը վտանգել»,- ասաց Իսագուլյանը։

«Փաստինֆո»-ի հարցին՝ ինչի՞ց են սկսվել հետապնդումները, Գառնիկ Իսագուլյանը պատասխանում է. «Սկզբից նրան ուղարկեցին սահմանային Վարդենիս ծառայության, սակայն առանց որևէ առարկությունների նա մեկնեց և արդեն տևական ժամանակ ծառայությունն անցկացնում է այնտեղից։ Քանի որ նա ազգային անվտանգության զինվորական հակահետախուզությունում է, սպասարկում են ամբողջ բանակը։ Վերջերս սկիզբ առած ծառայողական քննությամբ պայմանավորված ամեն օր երիտասարդ ծառայողին սահմանից Երևան են կանչում՝ իբրև թե հարց ու պատասխանի մասնակցելու։ Տղաս կապիտան է, արդեն տասը տարի նա ծառայության մեջ է, որից հինգը տարին՝ համակարգում, պետության գործուղմամբ սովորել է Մոսկվայի ФСБ -ի ակադեմիայում։ Այս իրավիճակն արդեն անթույլատրելի է, չի կարելի թույլ տալ, որ այս ամենը շարունակվի։ Նույն բանը կատարվում է նաև Պաշտպանության նախարարությունում, որտեղ իմ ունեցած տվյալներով, մասսայաբար ազատվում են այն սպաներից ու ծառայողներից, ովքեր իրենց բարձրագույն կամ զինվորական կրթությունը ստացել են Ռուսաստանում»,- նկատում է «Ազգային անվտանգություն» կուսակցության նախագահ Գառնիկ Իսագուլյանը։

Հեղինակ՝ Նվարդ Մանվելյան

Աղբյուր` Փաստինֆո