Փաստ ինֆո

«Պետք է ստեղծենք մի իրականություն, որ ապագայում Հայաստանը դարձնենք հայրենիք արաբների, ասորիների և այն ազգերի համար, որոնք վտանգ չեն ներկայացնում մեր ազգային անվտանգությանը,- այս մասին այսօր «Բեյրության աղետ. ինչպե՞ս աջակցել հայ համայնքին» թեմայով քննարկման ընթացքում ասել է սփյուռքի հարցերով հանձնակատար Զարեհ Սինանյանը և հավելել,- միանշանակ, Հայաստանի Հանրապետությունը հայտարարել է, որ հայրենադարձությունը մեր ազգային անվտանգության ծրագրի մի մասն է, որ մենք հայրենադարձության շնորհիվ և հայրենադարձության հաշվին նպատակ ունենք Հայաստանի բնակչությունը զգալիորեն ավելացնել: Սրանք փաստեր են, որոնք գաղտնիք չեն որևէ մեկի համար»:

Զարեհ Սինանյանը տեղեկացրել է նաև, որ վերջին երեք շաբաթվա ընթացքում 4 մարդատար ինքնաթիռ՝ մոտ 300 հայրենադարձներով, Լիբանանից եկել է Հայաստան.

«Դրանք այն մարդիկ են, որ մի ուղղությամբ տոմսերով են եկել, անձինք, որոնք այստեղ ձեռք են բերել անշարժ գույք: Սա տեղի էր ունենում նույնիսկ համավարակից առաջ, երբ լիբանանահայերը մեզ զգուշացնում էին, որ այս տարի սպասենք, իրենք գալու են, պարզապես COVID-ը և այս արհավիրքը արագացրին ընթացքը։

Լիբանանի դեպքում ունենք մի անուրանալի փաստ՝ տնտեսական ճգնաժամը, որն էլ պարզապես ավելի վատթարացավ COVID-19-ի պատճառով, դրա արդյունքում հայրենադարձության գործընթաց է սկսվել կամ դրա պատճառ է հանդիսացել։ Մենք պետք է այնպիսի իրականություն ստեղծենք Հայաստանում, որպեսզի ոչ շատ հեռավոր ապագայում կարողանանք մտածել ոչ միայն հայերի հայրենադարձման, այլ նաև Հայաստանը մեզ նման ազգերի համար հայրենիք դարձնելու մասին ՝ խոսքս Իսպանիայի արաբների, ասորիների, այն ազգերի մասին է, որոնք ազգային անվտանգության վտանգ չեն ներկայացնում Հայաստանին և կարող են հեշտորեն ինտեգրվել մեր երկրում, որովհետև խելացի, մտածված, քաղաքակիրթ ձևերով մենք կարող ենք դեմոգրաֆիկ իրավիճակը փոխել Հայաստանում, և դրանից պետք չէ ամաչել, դա ճիշտ քայլ է:

Դա արդեն հաջողություն կլինի: Պատկերացրեք՝ մենք Հայաստանը դարձնում ենք մի երկիր, որը գրավիչ է նաև ոչ հայերի համար»,- ասել է նա:

Աղբյուր` Փաստինֆո