Փաստ ինֆո

Ցավով պետք է արձանագրեմ, որ անգամ մեկ տարի անց վարչական մարմինը չի նայել վարչական վարույթի նյութերը՝ համոզվելու համար, թե արդյոք դիմումը եղել է պատշաճ ներկայացված։ Անգամ դատական նիստերի ընթացքում ներկայացել են անպատրաստ՝ նշելով, թե նյութերը եղել են թերի։ Այս մասին լրագրողների հետ զրույցում ասաց փաստաբան Ալեքսանդր Կոչուբաևը։ Փաստաբանը գտնում է, որ դա խոսում է այն մասին, որ Ռոբերտ Քոչարյանի՝ «Կյանք և ազատություն» գրքի նկատմամբ նախատրամադրվածություն կա։ Բացի այդ՝ Կոչուբաևը հիշեցրեց, որ այն վայրերում, որտեղ նախատեսված էր տեղադրել Ռոբերտ Քոչարյանի գրքի գովազդը, ընդամենը մեկ ամիս անց տեղադրվել էր վարչապետի ձեռագիր գրությունը։ Փաստաբանի գնահատմամբ, գործ ունենք ոչ իրավաչափ վարչարարության հետ։

Կոչուբաևի խոսքով՝ ի սկզբանե հայցադիմումը ներկայացնելիս ցանկանում էին դատական կարգով պարտավորեցնել, որ վարչական մարմինը տա գովազդի թույլտվություն, դատարանն այդ փուլում արձանագրել է, որ եղել է մերժում, այդ դատական ակտը չի բողոքարկվել և կա օրինական ուժի մեջ մտած միջանկյալ դատական ակտ, այժմ պետք է պարզել՝ արդյո՞ք մերժումները եղել են իրավաչափ, թե ոչ։

Կոչուբաևի խոսքով՝ երկրորդ նախագահի շուրջ ձևավորված իրավիճակը թույլ է տալիս եզրահանգել, որ կան իրավական դաշտից դուրս լուծումեր, որովհետև կա երկու տարբերակ, որոնցից մեկը, փաստաբանի խոսքով այն է, որ վարչական մարմնում բոլորն անմեղսունակ են, իրավական անգրագիտություն է տիրում, չկա տառաճանաչ մարդ այդ մարմնում, որ իրականացնեն պատշաճ վարչարարություն կամ այլ էլեմենտներ են առկա այս մերժման գործընթացում։ Ըստ փաստաբանի՝ տեղի է ունենում քաղաքական մոտիվներով մերժում։

Աղբյուր` Փաստինֆո