Փաստ ինֆո

Արմեն Թավադյանի և մյուսների գործով դատական նիստը հետաձգվեց։ 

Մինչ դատական նիստի հետաձգումը՝ Վարդգես Գասպարին հայտարարեց, որ ամբաստանյալներից մեկը նախկինում դիմակով չի եղել՝ պատճառաբանելով, թե քթի կոտրվածք ունի ու միջնորդեց, որ բժշկական տեղեկանք ներկայացվի։ Դատարանը մերժեց միջնորդությունը՝ նշելով, որ որևէ անձ չկա առանց դիմակի՝ դատական նիստերի դահլիճում, իսկ եթե կա, ապա կարող է անձամբ նման միջնորդություն ներկայացնել։

Ամբաստանյալ Վարուժան Մկրտչյանը միջնորդություն ներկայացրեց՝ միացված վարույթում քննվող քրեական գործերն առանձնացնելու և առանձին վարույթում քննելու մասին։ Վարուժան Մկրտչյանը նաև բարձրաձայնեց իր անձնագրի բացակայության հարցը, մասնավորապես, վերջինս նշեց, որ իր անձնագրի ժամկետն անցել է, իսկ նույնականացման քարտ իրեն չեն տրամադրում, քանի որ չունի փաստաթուղթ։

Մեղադրող դատախազները մտահոգություն հայտնեցին, որ անձնագիր ստանալու դեպքում գուցե սահմանը հատելու խնդիր ունենան։

Նախագահող դատավորը հայտարարեց, որ խնդրով կզբաղվի, իսկ գործերը մեկ վարույթում միացվելիս նաև ամբաստանյալի դիրքորոշումն է լսվել։

Հաջորդ դատական նիստը կկայանա հոկտեմբերի 8-ին։

Հիշեցնենք, որ Արմեն Թավադյանը մեղադրվում է «Մարտի 1»-ի գործով տուժողներից մեկին ենթադրաբար կաշառելու, 2019 թվականի մայիսի 13-ին Երևանի ընդհանուր իրավասության դատարանի Ավան նստավայրի շենքի առաջին հարկում տեղի ունեցած միջադեպի ժամանակ ջրի պլաստիկե շշով Վարդգես Գասպարին հարվածելու համար։

Հեղինակ՝ Իզաբել Սահակյան

Աղբյուր` Փաստինֆո