Փաստ ինֆո

Կառավարությունն այսօրվա նիստում որոշում կայացրեց Տավուշի մարզպետարանին պետական բյուջեից գումար հատկացնել։

Տավուշի մարզի սահմանամերձ համայնքների հրետակոծությունից տուժած բնակիչների վնասված անշարժ գույքի փոխհատուցման, վերակառուցման համար նախնական գնահատականով անհրաժեշտ է առնվազն 302 մլն 618 հազ. դրամ, որից 25 մլն դրամը կառավարությունն արդեն տրամադրել է։

ՀՀ տարածքային կառավարման և ենթակառուցվածքների նախարար Սուրեն Պապիկյանն ասաց, որ 227 մլն 618 հազ. դրամն ուղղվելու է վերականգնողական աշխատանքներին. «110 մլն 581 հազ. դրամ ուղղվելու է Այգեպար, Ներքին Կարմիրաղբյուր և Չինարի սահմանամերձ համայնքների բնակիչների վնասված անշարժ գույքի փոխհատուցմանը, 84մլն 357 հազ. դրամը՝ Այգեպար, Մովսես, Ներքին Կարմիրաղբյուր և Չինարի դպրոցների հիմնանորոգմանը և ապաստարանների նորոգմանը։ Նշյալ դպրոցները հրետակոծությունից չեն վնասվել։ 82 մլն 680 հազ. դրամն ուղղվելու է Ներքին Կարմիրաղբյուր համայնքում պուրակի կառուցման և Չինարիում բնակելի տան օժանդակելի շինարարությունների կառուցման և տարածքի բարեկարգման համար»,-ասաց նախարարը։

ՀՀ վարչապետ Նիկոլ Փաշինյանն ընդգծեց, որ հուլիսյան դեպքերից հետո պետք է աջակցեն սահմանապահ գյուղերին. «Որոշակի ազդակներ են ստացվում, որ աշխատանքները բավարար արագությամբ չեն ընթանում։ Ըստ ամենայնի՝ մի քիչ մենք ենք դանդաղում, մի քիչ բնակիչներն են ավելի արագ ուզում տեսնել աշխատանքները, բայց այս պահին գումար հատկացվում է։ Այս ընթացքում մի քանի քննարկումներ ենք ունեցել, որպեսզի այս հատկացվող գումարի ծախսումը դարձնենք առավել արդյունավետ։ Չինարի գյուղաի այն բնակելի գյուղը, որն ավերվել է, մենք այդ տունը զրոյից կկառուցենք։ Նաև Ներիքն Կարմիրաղբյուր գյուղում պուրակ կհիմնենք ավերված տներից մեկի տեղում, որովհետև այդտեղ մարդ չի ապրում։ Մենք այդ տարածքը կգնենք սեփականատիրոջից և կնվիրենք գյուղին»,-ասաց վարչապետը։

Աղբյուր` Փաստինֆո