Փաստ ինֆո

Ամուլսարի հավաքի կազմակերպիչները կարծես թե արտոնյալ պայմաններում են հայտնվում, արդեն մի քանի օր է, ինչ շարունակվում են հավաքները, սակայն որևէ գործողություն՝ հավաքը ցրելու համար չի իրականացվում։ Այս մասին «Փաստինֆո»-ի հետ զրույցում ասաց փաստաբան Ինգա Սարաֆյանը։

Ինչպես արդեն տեղեկացրել ենք՝ երկու օր է, ինչ Ամուլսարի հանք տանող ճանապարհին իրավիճակը լարված է. Ակտիվիստների կոչին ընդառաջ ցուցարարները հավաքվում են Ջերմուկի «տաքսիների կանգառում» ու բազմամարդ ավտոերթով շարժվում դեպքի Ամուլսար։

Համեմատության համար նշենք, որ ոստիկանությունը թույլ չէր տվել «Վետօ» շարժման ակտիվիստներին՝ հուլիսի 13-ին Խոր Վիրապից փոքրաթիվ ավտոերթի անցկացումը ու մեկ օրվա մեջ երկու անգամ նույն անձինք բերման ենթարկվեցին։ Ոստիկանները թույլ չտվեցին նաեւ իրավապաշտպան Ռուբեն Մելիքյանին հունիսի 12-ին միանձնյա հավաք անցկացնել ԱԺ-ի մոտ ու բերման ենթարկեցին։ Նրանք բողոքում էին հավաքներ անցկացնելու իրավունքի սահմանափակման դեմ։

Ավելին՝ որոշ դեպքերում անգամ հարուցվել են քրեական գործեր, օրինակ, երբ ԲՀԿ-ականները հունիսի 14-ին հավաքվել էին ԱԱԾ շենքի մոտ, որտեղ այդ պահին հարցաքննվում էր Գագիկ Ծառուկյանը, ՔԿ-ն այն գնահատել էր որպես օրենքով սահմանված կարգի խախտմամբ հավաքի կազմակերպում եւ անցկացում ու հարուցել քրեական գործ։ Օրերս հայտնի դարձավ, որ քրեական գործ է հարուցվել նաեւ վարկային արձակուրդ պահանջող Մանուել Մանուկյանի գործողությունների առնչությամբ՝ կրկին այն գնահատելով որպես ապօրինի հավաքի անցկացում։

Մինչդեռ Ամուլսարի ակտիվիստների կողմից հավաք անցկացնելու դեպքի առթիվ ոստիկանությունում նյութեր չեն նախապատրաստվում։ Համենայն դեպս «Փաստինֆո»-ի հարցմանն ի պատասխան այդ մասին հայտնել էին ՀՀ ոստիկանության լրատվական ծառայությունից։ Փաստաբան Սարաֆյանը «Փաստինֆո»-ի հետ զրույցում ասաց, որ արտակարգ դրության պայմաններում գոյություն ունի հստակ սահմանված արգելք՝ ցանկացած տիպի հավաքների։

«Օրինակ՝ ԿԲ շենքի դիմաց իրականացված հավաքի դեպքում այդ օրենքը, կարծես թե, գործում է, դրա վրա հղում կատարելով՝ հավաքը ցրվում է, վարչական, քրեական վարույթներ են հարուցվում, ապա Ամուլսարի վերջին օրերի իրադարձությունների կապակցությամբ, ստացվում է, որ օրենքը խտրականապես է գործում։ Այս դեպքում օրենքը, կարծես թե, չի գործում»,- ասաց Սարաֆյանը՝ նշելով, որ որևէ տարբերություն չի տեսնում, թե հավաքը կատարվում է ԿԲ մոտ, թե Կառավարության շենքի մոտ կամ այլ վայրում, եթե կա օրենք, ապա այն պետք է հավասարապես գործի։

Հարցին, թե ինչո՞վ կարող է պայմանավորված լինել երկակի ստանդարտները, փաստաբանը նշեց, որ չի կարող ասել, սակայն արձանագրեց, որ որևէ գործողություն չի իրականացվում՝ այդ հավաքը ցրելու համար։

Ինչ վերաբերում է հավաքների ազատությանը, փաստաբանը նշեց, որ այս պահին գործում է օրենք, որի համաձայն՝ հավաքներն արգելված են, սակայն դրանք արդեն գործում են մի շարք անձանց նկատմամբ և ինքը տրամաբանություն չի տեսնում, թե ինչու օրենքը չի գործում տվյալ դեպքում։

Հեղինակ՝ Իզաբել Սահակյան

Աղբյուր` Փաստինֆո