Փաստ ինֆո

«Տասը տարուց ավել է մեր թաղամասի 5 տների տակով ընդերքային ջրեր են հոսում և այդ տներն արդեն փլուզման եզրին են։ 20-ից ավել անչափահաս երեխա է ապրում այդ տներում։ Հիմա այս խնդրով նամակ ենք բերել, որ ներկայացնենք Կառավարություն, բայց ոչ մեկ մեր հարցին ուշադրություն չի դարձնում»,- Կառավարության շենքի դիմացից լրագրողների հետ ճեպազրույցում ասում է Սարի Թաղի բնակիչներից մեկը, ում տունը փլուզման եզրին է և մի քանի ընտանիքներով կանգնած են փողոցում հայտնվելու վտանգի առաջ։ 

Բնակիչը հայտնում է՝ դիմել են թաղապետարան, հետո քաղաքապետարան, բայց՝ ոչ մի արդյունք. «Հայկ Մարությանը մեզ ասաց միայն, որ ոչինչ չի կարող անել, ոչնչով օգնել չի կարող, մեզ խորհուրդ տվեց դիմել Կառավարություն, ասելով, որ այդ խնդիրը Կառավարության լուծելու հարցն է։ Հիմա էլ մենք դիմում ենք Կառավարությանը և ուզում ենք ասել, որ էդ անչափահաս էրեխեքը մեղք են, մի օր էդ տները կփլուզվի, էրեխեքը կմնան տակը»։

Կառավարության շենքի դիմացից բողոքին միացած Սարի Թաղի մեկ այլ բնակիչ էլ հայտնում է՝ ընդերքային ջրերի հետևանքով երեք ամիս առաջ փլուզվեց տան պատերից մեկը, որտեղ ապրում են 6 անչափահաս երեխաներ.«Ես իմ ուժերով որքան կարողացա մի թեթև վերանորոգեցի, բայց երեք ամիս չանցած ամիս նույն տեղից նույն ճաքերը կրկին բացվեցին։ Ոչ մեկից ոչ մի աջակցություն չեմ ստացել, որ կարողանամ տունս հիմնովին վերանորոգեմ, ուղղակի հիմա այն պահն է, որ նորից քանդվում են տները ու հիմա կանգնել ենք փաստի առաջ ու չգիտենք ի՞նչ կարելի է անել, ես էդ 6 անչափահաս երեխաներին ի՞նչ անեմ, երեխաներից ամենափոքրը երեք ամսական է, ասեք, ես ի՞նչ անեմ, հնարավորություն չունեմ նոր տուն գնելու»։

Բնակիչներից մեկը նշում է՝ 2009 թվականին նույն տեղում միևնույն խնդրի պատճառով փլված տների բնակիչները Կառավարության N 204 որոշումով 2009 – 2011 թվականների պետական բյուջեով նախատեսված նորակառույցի շինարարական ծրագրերի շրջանակներում կառուցվող բազմաբնակարանային շենքերի բնակարանները հատկացվել են փլված տների բնակիչներին. «Հիմա մենք էլ եկել ենք այստեղ, որպեսզի փորձենք հասկանալ՝ հնարավո՞ր է այդպիսի մի լուծում էլ մեր փլվող բնակարանների համար ունենալ, որովհետև այլ տարբերակ մենք չունենք, մեր տները փլուզվում են»։

Մանրամասները՝ տեսանյութում

Աղբյուր` Փաստինֆո