Փաստ ինֆո

«Հիմա վերքերը ամոքելու ժամանակն է։ Մեծ թվով կամավորներ են փորձում օգտակար լինել, որ անտունին տուն գտնեն, եթե սնունդի խնդիր կա սննդի հարցը լուծեն, բայց մեծ մասը անհատական մակարդակով են։ Հստակ օգնություն չկա, բացի այն հաշվարկները որոնք արվում են։ Ավելի հայտնի է անհայտ կորածների և մահերի թիվը Բեյրութում»։ Այս մասին այսօր Լիբանանից «Փաստինֆո»-ին տեղեկացրեց «Զարթօնք» օրաթերթի գլխավոր խմբագիր Սևակ Հակոբյանը։

Նրա փոխանցմամբ՝ Բեյրութի պայթյունի հետևանքով 137 մահվան դեպք կա, անհայտ կորածներին շարունակում են հիվանդանոցներում փնտրել։ Հայտնում են 11 հայերի մահվան մասին, անհայտ կորածների մեջ ևս կան հայեր, որոնց փնտրում են իրենց հարազատները։ Վիրավորների թիվը 250 է։

«Պայթյունը 30 կմ տրամագծով աղետ գործեց, այդ շրջանի մեջ է վնասը մեծամասամբ։ Չեմ կարող ասել, որ հայկական օջախները անմիջապես կիզակետում են, սակայն այդ ծովեզրյա հատվածը, որը դեպի Լիբանանի հյուսիս է ձգվում, բազմաթիվ հայեր են բնակվում և բնականաբար համեմատական չափով վնասներ են եղել»։

Սևակ Հակոբյանը հայտնում է, որ ազգային հաստատություն չկա, որ վնաս չի կրել՝ կառույցները, շենքերը բոլորը վնասված են՝ դպրոցները և եկեղեցիները ներառյալ։ Վնասվել է նաև Զարթօնքի խմբագրատունը։

«Յուրաքանչյուրն իր հեռավորության չափով է վնասվել։ Մեր՝ Զարթոնք խմբագրատունը, օրինակ՝ ամենամոտիկն էր պայթյունին և նավահանգստի անմիջապես կողքն էինք գտնվում։ Խմբագրատան շենքը շատ է վնասվել։ Դպրոց ունենք Բուրջ Համուդում, որը համեմատաբար ևս վնասված է։ Այսինքն՝ ինչքան մոտ կիզակետին, այդքան մեծ վնասներ։ Անշուշտ հստակ վնասների թվերը հաշվել չի լինի , բայց կարող եմ մեր կրած վնասներն ասել և բազմապետկեք։ Հազարավոր շենքեր են վնասվել, մեր շենքի համար, երեկ փոքր նախնական հաշվարկով պարզեցինք, որ 300.000 դոլար պետք է, որ մեր շենքը վերականգնվի։ Սա առավելագույն գումարն է, մի քիչ ավելի պակաս հայկականների համար։ Չհաշված բնակելի տները, ազգային հաստատությունները կարծում եմ շուրջ 20.000.000 դոլարի վնաս է կրել»։

Աղբյուր` Փաստինֆո