Փաստ ինֆո

Համաճարակային վիճակը ՀՀ-ում շարունակաբար թուլանում է, բայց ամենօրյա դեպքերի հայտնաբերման թվերը շարունակում են բարձր մնալ։ Այս մասին այսօր կառավարության նիստի ժամանակ ասաց ՀՀ վարչապետ Նիկոլ Փաշինյանը։

Վարչապետն ասաց՝ որոշակի վստահություն ունեն, որ դեպքերի հայտնաբերելիությունը լավացել է. «Եթե նախկինում մեր նոր դրական դեպքերը հասնում էին օրվա հետազոտությունների 25-30 տոկոսի մակարդակի, հիմա տատանվում են 15 տոկոս, ինչը նշանակում է, որ մենք հայտնաբերելիության էական աճ ունենք։ Այս առումով մարտավարության որոշակի փոփոխության հնարավորություն ենք ստացել այն իմաստով, որ եթե նախկինում հոսքերը մեծ էր և մենք պասիվ սպասում էինք, որ մարդիկ իրենք դիմեն, հիմա մարտավարության փոփոխություն է տեղի ունենում և Առողջապահության նախարարությունն ավելի նախաձեռնող կլինի և ռիսկային որոշակի խմբեր, կոլեկտիցներ, գործարաններ, սեփական նախաձեռնությամբ կգնանք այնտեղ և ախտորոշում կկայացնենք։ Սա այն ձևը կլինի, որ մեզ հնարավորություն կտա հաղթահարել համաճարակը»,-ասաց Նիկոլ Փաշինյանը։

ՀՀ առողջապահության նախարար Արսեն Թորոսյանն էլ ասաց, որ խորհուրդ է տրվում թեստավորման ծավալներն այնպիսի մակարդակում պահել, որպեսզի հայտնաբերված դեպքերը կազմեն թեստավորված դեպքերի ոչ ավել քան 10 տոկոսը. «Դժբախտաբար ունեցել ենք ժամանակ, երբ 30-ից ավել տոկոս ենք ունեցել, սակայն դրանից հետո կայուն անկում ունենք մինչև 15 տոկոս և հույս ունենք, որ կհասնենք այդ 10 տոկոսին»,-ասաց Արսեն Թորոսյանը՝ հավելելով, որ այդ նպատակով են նախաձեռնողական վերցնում ռիսկային փակ հաստատությունների կոլեկտիվներ կամ բնակիչներ հետազոտելու համար. «Որոշ ձեռնարկություններ կարող եմ ասել։ Դրանց մեջ են ամբողջական կոլեկտիվներով սուպերմարկետները, ֆաբրիկաները, փակ հաստատությունները, հոգեկան առողջության կենտրոններ, բանկեր, թաղապետարաններ։ Եթե այդ հաստատություններում մի հոգու դրական հայտնաբերում ենք, որպեսզի մնացածին էլ արագ հայտնաբերենք, մենք չենք սպասում նրանց մոտ սիմպտոմների ի հայտ գալուն, բոլորին հայտնաբերում ենք»,-ասաց նախարարը։

Վերջինս նշեց, որ հոգեկան առողջության կենտրոններից մեկում 350 հոգու են հետազոտել և 25 դրական դեպք են հայտնաբերել, որոնք որևէ սիմպտոմ չեն ունեցել։

Վարչապետն էլ նկատեց՝ եթե չգնային ու չհետազոտեին, այդ 25 կդառնար 50 և այդպես շարունակ. «Հիմա հայտնաբերվում է և հնարավորություն է տալիս, որ այդտեղ վարակի ծավալները սահմանափակվեն»,-ասաց վարչապետը։

Աղբյուր` Փաստինֆո