Փաստ ինֆո

ՀՀ վարչապետ Նիկոլ Փաշինյանը կառավարության այսօրվա նիստը սկսեց Լիբանանի ժողովրդին և կառավարությանն իր զորակցությունը հայտնելով։

«ՀՀ կառավարության անունից ցանկանում եմ ցավակցություն հայտնել մահացածների ընտանիքներին և շուտափույթ ապաքինում մաղթել բոլոր վիրավորվածներին։ Լիբանանը Հայաստանի ամենամոտ բարեկամների շարքում է։ Մեր երկու երկրներն ու ժողովուրդները կապված են պատմական և մշակութային բազմաթիվ թելերով։ Բեյրութը հանդիսացել է 30-րդ դարի հայկական սփյուռքի մայրաքաղաքը։ Տսանամյակներ շարունակ Բեյրութն է եղել Սփյուռքի կրոնական, քաղաքական և մշակութային կյանքի էպիկենտրոնը։ Այն առ այսօր պահպանում է իր եզակի նշանակությունը և հսկայական դերակատարումը որպես Մերձավոր Արևելքում հայկական ներկայության կարևորագույն կենտրոն։ Այս դժվարին պահին մենք չենք կարող անտարբեր մնալ Լիբանանի եղբայրական ժողովրդի և Բեյրութի հայկական համայնքի կարիքների նկատմամբ»,-ասաց վարչապետը։

Նա նշեց, որ Հայաստանն ուժերի ներածին չափով աջակցություն է ցուցաբերելու Լիբանանի կառավարությանը և տեղի հայ համայնքին։

Նիկոլ Փաշինյանի խոսքով ՀՀ կառավարությունը, ԱԳՆ-ի և Սփյուռքի գործերի գլխավոր հանձնակատարի գրասենյակի միջոցով, մշտական կապի մեջ է Լիբանանի կառավարության և համայնքային կառույցների հետ. «Հստակեցվում են հիմնական կարիքները, որոնց շրջանակներում էլ ՀՀ կառավարությունը թիրախային օգնություն կհասցնի Բեյրութ, ինչպես կառավարական, այնպես էլ համայնքային մակարդակով։ Ովքեր ցանկանում են անհատական նվիրատվություն ցուցաբերել, տեղեկացնում եմ, որ «Հայաստան» համահայկական հիմնադրամի կողմից դրամական փոխանցումների համար հատուկ հաշվեհամար է բացվել Կենտրոնական բանկում և առցանց դրամահավաքի հարթակ հիմնադրամի կայքում»,-ասաց վարչապետը՝ ընդգծելով, որ ՀՀ-ն կանգնած է Բեյրութի մեր հայրենակիցների կողքին և կգործադրվի ամեն ջանք՝ նրանց օգնության հասնելու և ստեղծված ծանր կացությունից դուրս բերելու համար։

Աղբյուր` Փաստինֆո