Փաստ ինֆո

Արարատի մարզի Նորամարգ գյուղի դպրոցի տնօրենի թափուր պաշտոնի տեղի համար մրցույթը, երկու անգամ տապալվել է։ Պայքարել ենք, սակայն հիմա ունենք հստակ Արարատի մարզպետարանի դիրքորոշումը, որ նրանք, ապօրինաբար խախտելով կարգը, դիտմամբ չեն եկել, մտածելով, որ հաղթելու է դպրոցի նախկին տնօրեն Ծովինար Գալստյանը։ Այս մասին լրագրողների հետ զրույցում ասաց Կառավարության շենքի դիմաց բողոքի ակցիա իրականացնող քաղաքացիներից մեկը՝Փերինե Գալստյանը, ով հայոց լեզվի և գրականության ուսուցչուհի է։

«Դա օրենքի խախտում է, կարգի խախտում է, պահանջում ենք արդարություն և, եթե մրցույթը չի կարող նորից տեղի ունենալ, թող Ծովինար Գալստյանը դառնա տնօրեն»,- ասաց նա։

Նրա խոսքով՝ տպավորություն է, որ մարզպետարանը դիտավորությամբ տապալում է մրցույթը։ Նա տեղեկացրեց, որ դիմել են նաև Նիկոլ Փաշինյանին՝ դեռևս առաջին տապալված մրցույթի ժամանակ, սակայն պարզվում է, որ նամակը վերահասցեագրվել է մարզպետարան, մինչդեռ՝ իրենց պայքարը հենց մարզպետարանի դեմ է։ Բացի այդ՝ դիմել են նաև Տիգրան Ավինյանին։

Գալստյանը ստեղծված իրավիճակում կոռուպցիոն ռիսկեր է տեսնում։ Մինչ կինը ներկայացնում էր խնդիրը, ոստիկանության ծառայողը մոտեցավ նրան և հորդորեց չիրականացնել հավաքներ՝ հղում կատարելով պարետի որոշմանը։

Աղբյուր` Փաստինֆո