Փաստ ինֆո

Բեյրութում շուրջ 300 հազար մարդ մնացել է առանց տանիքի՝ նավահանգստում որոտացած պայթյունից հետո, հայտարարել է քաղաքի նահանգապետ Մարվան Աբուդը: Այս մասին հայտնում է «Ալ-Մայադին» հեռուստաալիքը։

«Շուրջ 300 հազար մարդ ստիպված է եղել լքել իրենց տները նավահանգստի պայթյունից հետո»,- ասել է Աբուդը: Նա վնասի չափը գնահատել է 3-5 մլրդ դոլար:

Վերջին տվյալներով՝ զոհվել է ավելի քան 100 մարդ, տուժել 4 հազար մարդ: Նահանգապետը հայտարարել էր նաև նավահանգստում տեղի ունեցած պայթյունից հետո 10 փրկարարների մահվան մասին։

Իսկ ՌուսաստանիԱրտակարգ իրավիճակների նախարարությունն 5 օդանավ է ուղարկում Բեյրութ՝ քաղաքի նավահանգստում տեղի ունեցած պայթյունի հետևանքները վերացնելու համար: Այս մասին գրում է РИА Новости-ն։ Ռուս մասնագետները տեղակայելու են շարժական հիվանդանոց: Նշվում է, որ բոլոր բժիշկներին ապահովելու են կորոնավիրուսի դեմ պաշտպանական միջոցներով:

Հռոմի Պապ Ֆրանցիսկոսը ցավակցություն է հայտնել Լիբանանի ժողովրդին և աղոթել Բեյրութի նավահանգստի պայթյունի զոհերի համար:
«Աղոթենք զոհերի և նրանց հարազատների համար, աղոթենք Լիբանանի համար, որպեսզի երկիրը կարողանա վերապրել այդ ողբերգական և ցավագին պահը»,- ասել է Հռոմի Պապը: Նա կոչ է արել միջազգային հանրությանը օգնել Լիբանանին՝ հաղթահարել լրջագույն ճգնաժամը:
Ֆրանսիայի նախագահ Էմանուել Մաքրոնը վաղը կլինի Բեյրութում և հանդիպում կունենա երկրի քաղաքական բոլոր կողմերի հետ։

Աղբյուր` Փաստինֆո