Փաստ ինֆո

Լոռու մարզպետը Վանաձորի քաղաքապետին մեղադրում է չարաշահումների մեջ, մինչդեռ ՀՀ քննչական կոմիտեն հայտնում է, որ Վանաձորի քաղաքապետին մեղադրանք չկա առաջադրված։

«2020 թվականի փետրվարի 5-ին ՀՀ ոստիկանության Լոռու մարզային վարչությունում օպերատիվ տվյալներ են ստացվել այն մասին, որ Վանաձոր քաղաքի Ֆիդայիների փողոցի 12 հասցեում գտնվող նախկին հիվանդանոցի շենքի վաճառքը կատարվել է ձևական աճուրդով, որի արդյունքում հիշյալ շենք-շինությունը վաճառվել է անհամեմատ ցածր արժեքով», - «Փաստինֆո»-ին տեղեկացրեցին ՀՀ Քննչական կոմիտեից։

2020 թվականի փետրվարի 7-ին հարուցվել է քրեական գործ` ՀՀ քրեական օրենսգրքի 308-րդ հոդվածի (պաշտոնեական լիազորությունները չարաշահելը) 2-րդ մասով, որը նույն օրն ուղարկվել է Լոռու մարզային քննչական վարչություն: Շինության արժեքը պարզելու, օտարման գործընթացի ժամանակ թույլ տրված խախտումները, ինչպես նաև գործով նշանակություն ունեցող մի շարք հանգամանքներ պարզելու նպատակով նշանակվել է համալիր դատաշինարարատեխնիկական և դատաապրանքագիտական փորձաքննություն, որի եզրակացությունը դեռևս չի ստացվել:

Նախաքննության ընթացքում, այս պահի դրությամբ, վկայի դատավարական կարգավիճակով, հարցաքննվել են մի շարք անձինք, այդ թվում՝ Վանաձոր համայնքի գլխավոր ճարտարապետը: Իսկ համայնքի ղեկավարը դեռևս չի հրավիրվել հարցաքննության: Բացի այդ, Վանաձոր համայնքի ղեկավարի միջոցով ծանուցագրեր են ուղարկվել Վանաձոր համայնքի ավագանու անդամներին, սակայն կապված համաճարակի հետևանքով առաջացած իրավիճակի հետ, ավագանու անդամները քննության չեն ներկայացել՝ այդ մասին նախապես տեղյակ պահելով:
Այս պահի դրությամբ քրեական գործով մեղադրյալի, կասկածյալի դատավարական կարգավիճակ ունեցող անձ չկա: Նախաքննությունը շարունակվում է:

Հիշեցնենք, որ Լոռու մարզպետը ֆեյսբուքի իր էջում գրել էր, որ Վանաձորի ճարտարապետական տեսքի աղճատման հարցում Վանաձորի համայնքապետն իր ներդրումն ունի: Դա են վկայում քաղաքի այսօրվա տեսքն ու նաև վերջին երկու տարիների ընթացքում Լոռու մարզպետարանի կողմից Վանաձորի համայնքապետին ուղղված բազմաթիվ գրություններն ու քննարկումներն այս թեմայով՝ հորդորով՝ կասեցնել ապօրինաշինությունները: Հավելել էր, որ հնարավոր է, որ համայնքապետը, անկարողունակ ու անպատասխանատու գործելաոճի արդյունքում հայտնվի այն նույն տեղում, որտեղ իր ՀՀԿ-ական նախկիններն են: Վանաձորի քաղաքապետ Մամիկոն Ասլանյանը Անդրեյ Ղուկասյանին պատասխանել էր, որ եթե խոսելու բան ունի կարող է փաստաթղթավորի նոր խոսի, ինքը նման ցածրակարգ դեբատների մեջ չի մտնելու. «Դրա համար իրավապահ մարմիններ կան, ինքը հո դատախազ չէ»,- «Փաստինֆո»-ի հետ զրույցում ասել էր Վանաձորի քաղաքապետը։

Աղբյուր` Փաստինֆո