Փաստ ինֆո

Բեյրութում օգոստոսի 4-ին տեղի ունեցած պայթյունը զգացել են անգամ քաղաքից 240 կմ հեռավորության վրա, այդ թվում՝ Կիպրոսում։

Լիբանանահայ Վիգեն Թանաշեանը, ով այժմ Հայաստանում է գտնվում, «Փաստինֆո»-ի հետ զրույցում պատմեց՝ ծնողները և երկու եղբայները Բեյրութում են։ Այժմ վախեցած, սթրեսային ու սպասողական իրավիճակում. «Անթիլիասոմ են ապրում, Բեյրութի նավահանգստից 10-15 կմ հեռավորության վրա, բարձրահարկ շենքի 7-րդ հարկու։ Ասում են՝ իրենք ապակիների կոտրվելու խնդիր չեն ունեցել, բայց տունն ամբողջությամբ ցնցվել է»,-ասաց Վիգեն Թանաշեանը՝ ավելացնելով, որ վարչապետն այսօր սգո օր է հայտարարել։ Բեյրութում բոլորն այս պահին հոգեկան տրավմայի մեջ են, կապերն էլ գերծանրաբեռնված են, ինչը դժվարացնում է այնտեղ բնակվող հարազատների հետ կապ հաստատելը։

«Ծնողներս տանն են, սթրեսի մեջ։ Որքանով տեղեկացա զգուշացրել են, որ կրակը հանգած է, բայց տակը դեռ ծուռ կա։ Ասում են՝ հնարավոր է վտանգ լինի, որ նորից պայթյուն լինի, դրա համար պետք է զգույշ մնալ»,-ասաց լիբանանահայը։

Հարցին՝ արդյոք իր ծնողներն այս դեպքից հետո Հայաստան վերադառնալու ցանկություն հայտնե՞լ են, Վիգեն Թանաշեանն ասաց, որ ծնողները վերադառնալու ցանկություն ունեն, բայց որոշ ժամանակ անց, որովհետև այնտեղ պետք է կարգավորեն ամեն ինչ, որպեսզի վերջնական վերադառնան. «Նրանք շուտվանից ցանկություն ունեն, որովհետև այլևս դիմանալու չէ։ Ճգնաժամն ամբողջությամբ ամեն ինչի համը հանում է, հատկապես դոլարի խաղը։ Երկրում ամբողջությամբ խառնված վիճակ է»,-ասաց Վիգեն Թանաշեանը։

Նշենք, որ Վիգեն Թալաշեանի կինը՝ Լեոնորան օպերային երգչուհի է։ Վերջինս ֆեյսբուքյան իր էջում Լիբանանին իր զորակցությունն է հայտնել՝ գրելով. «Ամբողջ աշխարհն ուզում է ռեքվիեմ երգել Հրաշք Լիբանանի համար։Ափսոս, ու հազար ափսոս իմ չքնաղ քաղաք ,որքան ցավ ապրեցինք բոլորս, միայն կասեմ սիրելի հայրենակիցներ մենք Ձեր կողքին ենք, աղոթում ենք առ Աստված «Ձեր ցավն ու կորուստը նաև մերն է, քանզի Աստծո զավակն ենք մենք և հավասար ենք նրա աչքին անկախ ազգության և դավանանքի, Ձեզ ծով համբերություն այս դժվարին օրերին»։

Հիշեցնենք, որ օգոստոսի 4-ին Բեյրութում տեղի ունեցավ ավերիչ պայթյուն, որի հետևանքով մահացել է 100 մարդ, վիրավորվել՝ 4000 մարդ։ Հայաստանի ԱԳՆ-ն հայտնում է, որ Բեյրութում տեղի ունեցած պայթյունից այս պահի դրությամբ զոհվել է 11 հայ։

Աղբյուր` Փաստինֆո