Փաստ ինֆո

Լիբանանի մայրաքաղաք Բեյրութում երեկ տեղի ունեցած ավերիչ պայթյունի հետևանքով մեծ վնասներ են կրել նաեւ քաղաքի հայաշատ համայնքները։ Մի շարք անհաղթահարելի խնդիրների առաջ է հայտնվել նաև տեղի հայկական համայնքը։ Լիբանանում հացահատիկի պաշարը մեկ ամսից էլ քիչ կբավականացնի։ Այս մասին հայտնել է ՏԱՍՍ-ը՝ հղում անելով Ռոյթերսին։ Աղբյուրի փոխանցմամբ Լիբանանի Էկոնոմիկայի նախարարը հայտարարել է, որ երկրում հացահատիկի պաշարը մեկ ամսից էլ պակաս կբավականացնի։ Միևնույն ժամանակ նախարարը նշել է, որ երկրին անհրաժեշտ է պարենային անվտանգության պահպանման նպատակով առնվազն երեք ամսվա սնունդ մատակարարել։ 

Պարզելու համար հայկական համայնքի բնակիչներին սատարելու նպատակով ի՞նչ քայլեր է ձեռնարկել ՀՀ Կառավարությունը, ի՞նչ առաջնային խնդիրներ են դրված այս պահին բեյրութահայությանն աջակցելու ուղղությամբ, հնարավո՞ր է արդյոք անհրաժեշտությամբ պայմանավորված չարթերային չվերթներ կազմակերպել՝ հայ համայնքի ներկայացուցիչներին Հայաստան տեղափոխելու համար՝ «Փաստինֆո»-ն փորձեց մեկնաբանություններ ստանալ վարչապետի մամուլի խոսնակ Մանե Գևորգյանից. «Արտաքին գործերի մամուլի խոսնակն այս թեմայով հրապարակում է կատարել։ Բացի այդ ես էլ մեկնաբանություն եմ թողել և հայտնել, որ այս պահին ԱԳՆ-ն, Սփյուռքի հանձնակատարի գրասենյակը և Լիբանանում Հայաստանի դեսպանը համատեղ աշխատում են, կարիքների գնահատում է կատարվում, որի արդյունքում կորոշվի, թե ինչ տեսակի աջակցություն կարող է Հայաստանի Հանրապետությունը տրամադրել Լիբանանին»,- ասաց վարչապետի խոսնակը։

Աղբյուր` Փաստինֆո