Փաստ ինֆո

Ըստ քրեական գործով ձեռք բերված տվյալների՝ ՀՖՖ նախկին նախագահ Ռուբեն Հայրապետյանը 2003թ հունիիսի 20-ից ՌԴ քաղաքացի է։

Այս մասին «Փաստինֆո»-ի հարցմանն ի պատասխան հայտնեց ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը։

«ՌԴ գլխավոր դատախազությունց դեռեւս չեն ստացվել նրա նկատմամբ հետախուզումը ՌԴ տարածքում դադարեցնելու եւ դրա հնարավոր հիմքերի վերաբերյալ ակնկալվող պարզաբանումները, եւ այս պահին դեռեւս չենք կարող ասել՝ արդյո՞ք Ռ. Հայրապետյանի՝ ՌԴ քաղաքացի հանդիսանալը հիմք է հանդիսացել հետախուզումը դադարեցնելու որոշում կայացնելու համար», - նշեց Գոռ Աբրահամյանը։

Ավելի վաղ «Փաստինֆո»-ն հայտնել էր, որ ՀՖՖ նախկին նախագահ Ռուբեն Հայրապետյանի նկատմամբ ՌԴ-ն դադարեցրել է հետախուզումը։

«Հետախուզումն ինքնին անհիմն էր, քանի որ նրա գտնվելու վայրը պարզ է։Չեմ կարծում, որ կարելի է հետախուզել մի մարդու, ում գտնվելու վայրը հայտնի է»,- «Փաստինֆո»-ին ասել էր Մակինյանը։

Նշենք, որ Հայրապետյանն այժմ գտնվում է Մոսկվայում վարձակալած բնակարանում, նրան ՌԴ-ում ցուցված էր մեկուսացում։ Պաշտպանը բազմիցս բարձրաձայնել է, որ Ռուբեն Հայրապետյանի գտնվելու վայրի մասին տեղեկատվությունը տրամադրվել է վաղուց՝ պաշտոնական փաստաթղթերով, սակայն վարույթն իրականացնող մարմինն այդուհանդերձ որոշում է կայացրել նրա նկատմամբ հետախուզում հայտարարելու մասին։

Հիշեցնենք, որ Ռուբեն Հայրապետյանը և Ռաֆիկ Հայրապետյանը որպես մեղադրյալ են ներգրավվել՝ ՀՀ քրեական օրենսգրքի 119-րդ հոդվածի 2-րդ մասի 3-րդ, 5-րդ կետերով՝ մի խումբ անձանց կամ կազմակերպված խմբի կողմից առևանգված կամ պատանդ վերցված անձին ֆիզիկական ուժեղ ցավ կամ հոգեկան ուժեղ տառապանք պատճառելու, 133-րդ հոդվածի 2-րդ մասի 1-ին, 2-րդ, 7-րդ կետերով՝ մի խումբ անձանց կողմից նախնական համաձայնությամբ կյանքի կամ առողջության համար վտանգավոր բռնություն գործադրելով կամ դրա գործադրելու սպառնալիքով շահադիտական դրդումներով անձին առևանգելու և 322-րդ հոդվածի 2-րդ մասով՝ բռնության գործադրմամբ կամ դա գործադրելու սպառնալիքով ինքնիրավչություն կատարելու համար։ ՔԿ վարույթում քննվող քրեական գործով Ռուբեն Հայրապետյանի նկատմամբ որես խափանման միջոց է ընտրվել կալանավորումը, ու նրա նկատմամբ հայտարարվել հետախուզում, իսկ Ռաֆիկ Հայրապետյանի նկատմամբ որպես խափանման միջոց է ընտրվել ստորագրությունը չհեռանալու մասին։

Նրա նկատմամբ քրեական գործ է քննվում նաեւ ՀՔԾ-ում։

Աղբյուր` Փաստինֆո