Փաստ ինֆո

ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանն այսօր միջնորդություն է ներկայացրել դատարանին՝ որպես տուժող դատակոչված 102 անձանց որպես տուժող դատակոչի ցուցակից հեռացնելու և նրանց այս գործով որպես վկա ներառելու մասին։

Ալումյանը նշեց, որ քննիչ Մուշեղյանի որոշմամբ, «Մարտի 1»-ի գործից առանձին վարույթում է անջատվել Ռոբերտ Քոչարյանի, Յուրի Խաչատուրովի, Արմեն Գևորգյանի և Սեյրան Օհանյանի վերաբերյալ քրեական գործը, որի շրջանակներում որևէ մեկը տուժող կամ տուժողի իրավահաջորդ չի ճանաչվել։ Ալումյանը հիշեցրեց ՀՔԾ պետի պարզաբանումն առ այն, որ սույն գործը չի վերաբերում 2008թ մարտի 1-2-ի իրադարձությունների ժամանակ տեղի ունեցած սպանություններին։

Փաստաբանի դիտարկմամբ՝ սույն գործով դատակոչի ցուցակում քննիչի կողմից ընդգրկված են եղել «Մարտի 1»-ի գործով 10 տուժողների իրավահաջորդները, ինչպես նաև՝ գործով 228 տուժողներից 102-ը, ընդ որում, այդ անձինք նշվել են որպես տուժողներ և տուժողների իրավահաջորդներ։Ալումյանը հատկանշական համարեց, որ գոյություն չունի որևէ չափանիշ, թե ինչից ելնելով են գործով տուժողներից 102-ը ներգրավվել դատակոչի ցուցակում, իսկ մնացած 126-ը՝ անբացատրելի կերպով՝ ոչ։ Բացի այդ՝ Ալումյանը նշեց, որ կաշառքի մեղադրանքի և փողերի լվացման վերաբերյալ մեղադրանքը մարտի 1-2 իրադարձությունների հետ որևէ առնչություն չունեն, հետևաբար, որևէ կերպ առնչություն չունեն տուժած անձանց հետ։ Ինչ վերաբերում է սահմանադրական կարգի տապալմանը, ապա Ալումյանը նշեց, որ տվյալ հանցակազմում հանցագործության անմիջական օբյեկտ են սահմանադրական կարգը պաշտպանող հասարակական հարաբերությունները և հոդվածի դիսպոզիցիայից պարզ է, որ հանցակազմը լրացուցիչ կամ ֆակուլտատիվ օբյեկտ չունի և հոդվածում նկարագրված ոտնձգության օբյեկտ կարող է լինել սահմանադրական կարգը։ Նրա խոսքով՝ նշված հոդվածով հանցագործություն տեղի ունենալու դեպքում հետևանքները վերաբերում են բոլորին՝ հավասար չափով։ Ալումյանն ընդգծեց, որ դատական նիստին կանչելու ենթակա անձանց ցուցակում որպես տուժող նշված լինելու փաստով ձեռք չեն բերել սույն գործով տուժողի դատավարական կարգավիճակ։ Ալումյանը գտնում է, որ նրանց ցուցմունքները կարող են կարևոր նշանակություն ունենալ և իրենց նպատակն այն չէ, որ նրանք չգան դատարան և ցուցմունք չտան, այլ՝ նրանք հարցաքննվեն որպես վկա։ Ալումյանը նշեց, որ նույն միջնորդությունը վերաբերում է նաև 10 տուժողների իրավահաջորդներին։ Հովհաննես Խուդոյանն էլ ասաց, որ քրեական գործի նյութերում չի հայտնաբերվել գեթ մեկ փաստաթուղթ, որով ճանաչվել է տվյալ անձանց տուժողի դատավարական կարգավիճակը՝ առաջադրված մեղադրանքների կոնտեքստում և այդպիսի դատավարական կարգավիճակ անձինք ի սկզբանե չեն ունեցել։

Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Հեղինակ՝ Իզաբել Սահակյան

Աղբյուր` Փաստինֆո