Փաստ ինֆո

Հայկ Մարությանի քաղաքապետ ընտրվելուց հետո կանաչապատ տարածքներն աննախադեպ ծավալով ավելացել են։ Քաղաքապետարանում մամուլի ասուլիսի ժամանակ այս մասին ասաց Կենտրոնի վարչական շրջանի ղեկավար Ավետ Պողոսյանը։

Նա նշեց, որ ոչ միայն կանաչապատումները, այլև նոր ոռոգման ցանց ունեցող տարածքներն էլ են ավելացել, և Ավետ Պողոսյանի խոսքով տարեվերջին հարյուրավոր հեկտարներով կունենանք նման տարածքներ. «Նորանկախ Հայաստանի պատմության ընթացքում նման ծավալի կանաչապատում և նման ծավալի ոռոգման համակարգերի ներդրում Երևան քաղաքում չի եղել։ Տարեվերջում կունենանք դրա թվային պատկերը, չնայած աչքով էլ դա քաղաքում երևում է»,-ասաց Ավետ Պողոսյանը։

Անդրադառնալով Օղակաձև այգու 6-րդ հատվածին՝ ԱվետՊողոսյանը նկատեց՝ կաղապարված են օրենսդրական օրենքներով ու նորմերով և աշխատում են երկու ուղղությամբ։ Մի կողմից փաստացի աշխատում են կանաչապատ տարածքներն ազատագրելու և ավելի հարմարավետ միջավայր ստանալու ուղղությամբ, մյուս կողմից այդ հատվածում առնչվում են օրենսդրական խնդիրների, որոնք դանդաղեցնում են իրենց աշխատանքը. «Այդ ուղղությամբ աշխատում ենք ԱԺ մեր գործընկերների հետ, մասնավորապես հիմա շրջանառության մեջ է վարձակալական պայմանագիրն անորոշ ժամկետով երկարացնելուդրույթը փոփոխելու մասին նախագիծը, որով քաղաքապետարանը շատ ավելի ազատ կգործի և ավարտված պայմանագրերը ստիպված չի լինի երկարացնել կամ էլ առանց երկարացնելու կմնան ուժի մեջ։ Սրանք կարևոր գործիքակազմ են։ Օղակաձև այգու հատվածում ունենք 98 տնտեսվարող, նրանց պայմանագրերի մեծ մասն ավարտից հետո դադարելու են գործել և հողային տարածքներն անցնելու են համայնքին և կանաչապատվելու են»,-հավելեց Ավետ Պողոսյանը՝ ընդգծելով, որ քաղաքային իշխանություններն աշխատում են համայնքային հողերը հետ բերելու և կանաչապատում անելու ուղղությամբ։

Աղբյուր` Փաստինֆո