Փաստ ինֆո

Ամուլսարում իրավիճակը շարունակում է լարված մնալ, փակվել է Ջերմուկ տանող ճանապարհը, հավաքվել են մեծ թվով ոստիկաններ։ «Փաստինֆո»-ի հաղորդմամբ՝ ոստիկանությունը բերման է ենթարկել մի շարք ակտիվիստների՝ ապօրինի հավաքին մասնակցելու համար։

Քաղաքացիները ծափահարում են ու գոչում՝ «Ամուլսար, միայն Սար»։

Քաղաքացիները պնդում են, որ եկել են, որ իրենց առողջությունը պահպանեն, և կառավարությունից խնդրին վերջնական լուծում են պահանջում։

Վայոց Ձորի ոստիկանապետը տեղեկացրեց, որ «Լիդիան Արմենիա»-ի վագոն-տնակները գտնվում են իրենց կողմից վարձակալված տարածքում, ինչ վերաբերում է «բուֆերային» գոտին փակելու ակտիվիստների դիտարկումներին՝ ոստիկանապետ Գեւորգ Ազիզյանը նշել է, որ քրեական գործ է հարուցվել, որը քննվում է։

Ճանապարհը պարբերաբար բացվում է, մեկ երկու մեքենա է անցնում, դա Ջերմուկ մուտք գործելու միակ ճանապարհն է։
Այսօր առավոտյան «Լիդիան Արմենիան» նախաձեռնել էր «Լիդիանի» օրինական տարածքում արդեն մոտ երկու տարի ապօրինի գտնվող վագոն-տնակների հեռացումը ընկերության տարածքից։

«Լիդիան Արմենիան» ունի Ամուլսարի տարածքում աշխատանքներ իրականացնելու բոլոր թույլտվությունները, որոնք որեւէ կերպ չեն չեղարկվել կամ նույնիսկ ժամանակավոր չեն դադարեցվել։ Ամուլսարում աշխատանքների իրականացման միակ խոչընդոտը եղել է արդեն երկու տարի ապօրինի կերպով «Լիդիանի» տարածք ներխուժած անձանց խումբը։ Ընկերությունը կից տեսանյութում ներկայացրել էր նաեւ պահնորդական ծառայության ղեկավար Արթուր Դանիելյանի հիմնավորումներն ու նրա կողմից ներկայացրած փաստաթղթերը՝ ինչ հիմքով են տնակները հեռացրել, ինչպես նաեւ՝ Ամուլսարի հարակից համայնքների բնակիչների արձագանքը։

Ընկերությունը կոչ էր արել իրավապահ մարմիններին՝ ապահովել տարածքում օրինականության վերականգնումը, կարգի հրավիրել սպառնալիքներ ու բռնության կոչեր անող խմբավորմանը, «այլապես հնարավոր անցանկալի զարգացումների, այդ թվում համայնքում հնարավոր բախումների պատասխանատվությունը կրելու են իրավապահ մարմինները»։

Աղբյուր` Փաստինֆո