Փաստ ինֆո

«Փաստինֆո»-ի տեղեկություններով՝ հայտնի գործարար Խաչատուր Սուքիասյանի, նույն ինքը՝ Գռզոյի, կրտսեր եղբայրը հարցաքննվել է՝ մոսկվաբնակ գործարար Օնիկ Կարապետյանին ազատությունից ապօրինի զրկելու և նրանից առանձնապես խոշոր չափերով շորթում կատարելու դեպքի առթիվ հարուցված քրեական գործով։

Գործի հանգամանքների մասին պաշտոնական մարմիններն առայժմ ձեռնպահ են մնում տեղեկություններ տրամադրելուց։ «Փաստինֆո»-ն կապ հաստատեց գործով որպես տուժող ճանաչված Կարապետյանի փաստաբանի հետ՝ պարզելու, թե արդյո՞ք Օնիկ Կարապետյանի մասնակցությամբ կատարվել է առերես հարցաքննություն, սակայն պաշտպանը նշեց, որ մանրամասներ հայտնել չի կարող՝ հղում կատարելով նախաքննական գաղտնիքին։

Ինչպես արդեն տեղեկացրել ենք՝ միջադեպը տեղի է ունեցել «ՍԻԼ Կոնցեռն» ՍՊԸ-ի հիմնադիր, գործարար Խաչատուր Սուքիասյանին պատկանող գրասենյակներից մեկում։ 2020թ. հուլիսի 22-ին՝ ժամը 04:00-ին, քաղաքացին հաղորդում է տվել այն մասին, որ 2020թ. հուլիսի 21-ին՝ ժամը 23:00-ի սահմաններում, Նար-Դոս փողոցում գտնվող ՓԲ ընկերության գրասենյակում երկու անձինք, հարվածներ հասցնելով, իր և իր ընտանիքի անդամների նկատմամբ բռնություն գործադրելու սպառնալիքով, իրենից պահանջել են 200.000 ԱՄՆ դոլար գումար և ստիպել են ստորագրել ինչ-որ փաստաթուղթ, ապա այդ գումարը ստանալու նպատակով իրեն ապօրինի զրկել են ազատությունից՝ իր կամքին հակառակ պահելով նշված գրասենյակում: Դեպքի առթիվ հարուցվել է քրեական գործ՝ ՀՀ քրեական օրենսգրքի 133-րդ հոդվածի (ազատությունից ապօրինի զրկելը) 2-րդ մասի 7-րդ կետով և 182-րդ հոդվածի (շորթում) 3-րդ մասի 2-րդ կետով։ Օնիկ Կարապետյանը գործով տուժող է ճանաչվել։

Համացանցում տարածվել էին նաեւ լուսանկարները՝ նրա նկատմամբ կիրառված բռնության հետեւանքների ապացույցներով։

Դեպքը ստացավ հանրային մեծ հնչեղություն, ինչից հետո տուժողն ընդհատակ է անցել եւ խուսափում է մամուլի հետ շփումներից։

Նշենք, որ դեպքը կապվում է հայտնի գործարար Գռզոյի ընտանիքի հետ, որը 2018 թվականի իշխանափոխությունից հետո, շրջանառվող տեղեկությունների համաձայն, իշխանությունների հետ գտնվում է բարյացակամ հարաբերությունների մեջ ու բացառված չէ, որ հենց այս հանգամանքը շորթման ու բռնության զոհ դարձած գործարարին դրդում է որոշակի զգուշավորության, քանզի վստահ չէ, որ մեղավորները կպատժվեն, ինչպես եղավ ծեծված եւ կոմայի մեջ գտնվող փոխգնդապետի գործով։

Հիշեցնենք, որ այս գործով շոշափվում էր մարզպետի անունը, բայց մարզպետին մեղադրանք չառաջադրվեց, իսկ գործն էլ դատարան ուղարկվեց միայն մեկ մեղադրյալի մասով, թեեւ անգամ նախաքննական մարմինը հաստատված էր համարել, որ փոխգնդապետին ծեծել են խմբով, իսկ խմբի մյուս անդամներն այդպես էլ մնացին չբացահայտված։

Աղբյուր` Փաստինֆո