Փաստ ինֆո

Ամուլսարում այս պահին լարված իրավիճակ է: Մեծ թվով քաղաքացիներ 6 կիլոմետրանոց ավտոերթով հասել են այն պահակակետ, որտեղ պահնորդները գիշերը հեռացրել են ակտիվիստների վագոն-տնակները:
Այստեղ է նաև Վայոց ձորի ոստիկանապետը: Պահանջում են իշխանություններից վերջնական գնահատական տալ, ինչպես են պատկերացնում խնդրի լուծումը։

Ամուլսարում իրավիճակը քիչ առաջ խիստ լարվեց, սկսվեց հրմշտոց: Նախնական տեղեկություններով բերման ենթարկվածներ կան: Նշենք, որ այստեղ է նաև ԲՀԿ-ական պատգամավոր Արման Աբովյանը:

Ջերմուկի «տաքսիների կանգառ» կոչվող հրապարակում Ամուլսարի շահագործմանը դեմ մի խումբ քաղաքացիներ են հավաքվել՝ բողոքի ցույց անցկացնելու համար: Բնապահպան-ակտիվիստ Շիրակ Բունիաթյանի խոսքով, մարդկանց մի մասն էլ դեռ ճանապարհին են: Ըստ նրա, ցույցին գործից հետո միանալու են նաև Ջերմուկի առողջարանների աշխատակիցները: Շիրակ Բունիաթյանի խոսքով, ցույցը կառավարության դեմ չէ, հակակառավարական չէ և մարդիկ դուրս են եկել «իրենց հողը, ջուրը, հայրենիքը պահելու համար»՝ հարցին վերջնական լուծում ակնկալելով:

Այսօր առավոտյան Ջերմուկ ուղեւորվելու կոչ էր արել նաեւ «Կանաչ ապագա» բնապահպանական շարժման անդամ Վահագն Վարագյանը: «Ես կոչ եմ անում մեր երկրի բոլոր բնապահպաններին, մարդկանց, որոնք իրականում մտահոգ են Հայաստանի բնապահպանական խնդիրներով, որոնք տեսնում են, որ Հայաստանն այլ ապագա չունի, քան ավելի լավ շրջակա միջավայր, արձագանքել Ամուլսարի պահապանների կոչին եւ ուղեւորվել այնտեղ»,-ֆեյսբուքյան իր էջի ուղիղ եթերում հայտարարեց Վարագյանը՝ նշելով, որ ամեն հարցով աջակցելու են Ամուլսարի պաշտպանների կոչին:

Ավելի վաղ «Լիդիան Արմենիան»-ը հայտարարել էր, որ նախաձեռնել է «Լիդիանի» օրինական տարածքից արդեն մոտ երկու տարի ապօրինի գտնվող վագոն-տնակների հեռացումը ։ «Լիդիան Արմենիան» ունի Ամուլսարի տարածքում աշխատանքներ իրականացնելու բոլոր թույլտվությունները, որոնք որեւէ կերպ չեն չեղարկվել կամ նույնիսկ ժամանակավոր չեն դադարեցվել։ Ամուլսարում աշխատանքների իրականացման միակ խոչընդոտը եղել է արդեն երկու տարի ապօրինի կերպով «Լիդիանի» տարածք ներխուժած անձանց խումբը։ Ընկերությունը կից տեսանյութում ներկայացրել էր նաեւ պահնորդական ծառայության ղեկավար Արթուր Դանիելյանի հիմնավորումներն ու նրա կողմից ներկայացրած փաստաթղթերը՝ ինչ հիմքով են տնակները հեռացրել, ինչպես նաեւ՝ Ամուլսարի հարակից համայնքների բնակիչների արձագանքը։

Ընկերությունը կոչ էր արեել իրավապահ մարմիններին՝ ապահովել տարածքում օրինականության վերականգնումը, կարգի հրավիրել սպառնալիքներ ու բռնության կոչեր անող խմբավորմանը, «այլապես հնարավոր անցանկալի զարգացումների, այդ թվում համայնքում հնարավոր բախումների պատասխանատվությունը կրելու են իրավապահ մարմինները»։

Աղբյուր` Փաստինֆո