Փաստ ինֆո

«Ես հեռանում եմ ամենից, ամեն տեսակ սուտ խաղերից, բարով մնաք...» Արթուր Մեսչյանի երգի այս տողերով է Երևանի ավագանու «Լույս» խմբակցության ղեկավար Դավիթ Խաժակյանը բնորոշում այսօր մամուլում տարածված այն լուրերը, թե Երևանի գլխավոր ճարտատարապետ Արթուր Մեսչյանը պատրաստվում է հեռանալ իր պաշտոնից. «Ինչո՞ւ հիշեցի այս կատարումը, քանի որ այն ինձ հիշեցրեց քաղաքապետի ասուլիսը, որտեղ նա խոսելով գլխավոր ճարտարապետի հնարավոր հրաժարականի մասին, նշեց, թե Մեսչյանն իսկզբանե ասում էր, թե գալու է այդ օրը, երբ նա որոշակի աշխատանք կատարած հրաժարվելու է այդ պաշտոնից։ Ինքս էլ որքան հիշում եմ, խոսք էր գնում երկու տարվա մասին և, եթե դա այդպես է, ապա դա մոտավորապես հոկտեմբեր ամիսն է»։

Ֆեյսբուկյան ուղիղ միացմամբ  Դավիթ Խաժականը մի շարք պարզաբանումներ է տալիս մամուլում տարածված լուրերին. «Կուզենայի  քաղաքաշինական գործառույթների մասին  որոշակի խոսք ասել, ինչի վերաբերյալ  երկու տարի լռել եմ, որովհետև ինձ, որպես Մեսչյանի ստեղծած արվեստի երկրպագուի,  որպես ավագանու ընդդիմադիր անդամ միշտ դժվար է եղել   քննադատել քաղաքապետարանի ճարտարապետական բլոկը,  առավել ևս՝ անվանական գլխավոր ճարտարապետին։ Հիմա էլ խոսքս չեմ կառուցի որպես քննադատություն, այլ որպես վերլուծություն»։

Դավիթ Խաժակյանը նկատում է՝ մեր քաղաքաշինական նորմերն այնպես են գրված, որ ինչ -  որ հարց  վիճարկելը շատ դժվար է դառնում և, եթե նախկինում մարդիկ հույս ունեին, որ նոր քաղաքապետը և առավել ևս, պարոն Մեսչյանը՝ որպես գլխավոր ճարտարապետ, թույլ չեն տա այս կամ այն շենքի կառուցապատումը, բայց դա սկսեց իրարհետևից տեղի ունենալ. «Մեզ ահազանգում էին տարբեր շենքերի բնակիչներ, ասում, որ մեկ – երկու տարի առաջ եկել են քաղաքապետարան, ներկայացրել են խնդրահարույց հարցերն ու անթույլատրելի շինությունների կառուցապատումների օրինակները, որին պարոն Մեսչյանը պատասխանել է՝ քանի ինքը գլխավոր ճարտարապետ է, նման բան տեղի չի ունենա, բայց բոլորովին այդպես չի եղել, այլ հակառակը։  Ստացվում էր այնպես, որ արդեն իսկ կառուցապատված շենքի թույլտվության դեմ պայքարելը դառնում էր շատ բարդ մի բան և խնդիրը գնալով ավելի խնդրահարույց էր դառնում։  Ակնհայտ էր դառնում, որ այս կամ այն կառուցապատողների կողմից քաղաքապետարանին արված  որոշակի նվիրատվությունները, համայնքների հետ որոշակի փոխհարաբերությունները շինթույլտվություններ տալիս ազդեցություններ են ունեցել և որոշումները կայացվել են ոչ այնքան քաղաքաշինության տրամաբանության մեջ, որքան ինչ որ բան տալու պատրաստ կառուցապատողին շինթույլտվություն տալու գործելաոճով։ Այսպիսի օրինակները բազմաթիվ են քաղաքով մեկ և, առնվազն ցավալի է, որ պարոն Մեսչյանը որոշակի գործառույթ է ունեցել այս պրոցեսի մեջ։ Համոզված եմ,  շատ անգամներ նա ստորագրում էր այնպիսի փաստաթղթերի տակ, որոնք իր համար ընդունելի չէին, բայց,  կար քաղաքապետի կողմից կայացված  քաղաքական որոշում»։ 

Դավիթ Խաժակյանը ցավով արձանագրում է. «Այս ողջ  ընթացքում քաղաքապետարանում համակարգաստեղծ գործունեություն չի ծավալվել, ինչն ամեն օր գլխացավանք է դառնում մեր քաղաքի բնակիչների համար»։  

Աղբյուր` Փաստինֆո