Փաստ ինֆո

«Խմբակցությունում չի քննարկվել անգամ ՍԴ դատավորի թեկնածուներին ընդունելու, լսելու, քվեարկության հարցերը, որովհետև ես թերահավատ եմ, որ մենք կմասնակցենք քվեարկությանը, քանի որ մենք ի սկզբանե ՍԴ շուրջ ծավալված գործընթացը գնահատել ենք հակաիրավական»։ Այս մասին այսօր «Փաստինֆո»-ի հետ զրույցում ասաց ԲՀԿ պատգամավոր Գևորգ Պետրոսյանը՝ հայտնելով իր կարծիքը, թե ինչու խմբակցությունը չի հանդիպել ՍԴ դատավորի թեկնածուներին։

«Հիմա այս դեպքում՝ մասնակցությամբ վտանգ կա, որ փաստորեն մենք լեգիտիմացնում ենք նախկինում՝ մեր կողմից հակաիրավական գնահատված գործընթացը։ Սա իմ կարծիքն է, հնարավոր է խմբակցության քննարկման արդյունքում որոշվի հանդիպել թեկնածուների հետ, և նաև մասնակցել նրանց ընտրությանը։ Սա ժամանակի հարց է»։

Կոնկրետ ներկայացված թեկնածուների անձերին Գևորգ Պետրոսյանը դրական է վերաբերվում։

«Վաղարշյանն ու Ավետիսյանն իմ աշխատանքային ընկերներն են։ Մենք գրեթե 20 տարի աշխատում ենք միասին ԵՊՀ իրավագիտության ֆակուլտետում, երկուսն էլ բարձր որակի իրավաբաններ են, ինձ համար շատ ցավալի էր, որ Վաղարշյանի թեկնածությունը նախորդ անգամ մերժվեց, լիահույս եմ, որ այս անգամ ԱԺ-ն իսկապես կգնահատի նրա գործնական հատկանիշները և Ճիշտ ընտրություն կկատարի։ Ավետիսյան Վահրամի մասին մի քանի անգամ ասել եմ, նա բարձր որակի իրավաբան է և կարծում եմ, որ իր ներկայությունը ՍԴ-ում կնպաստի ՍԴ հեղինակության բարձրացմանը։ Պարոն Խունդկարյանի հետ ունեցել ենք թռուցիկ հանդիպում, որի արդյունքով հիմքեր ունեմ պնդելու, որ նրա ներկայությունը նույնպես ՍԴ-ի համար պատվաբեր կլինի»։

Գևորգ Պետրոսյանն ասում է, որ ինքը՝ որպես իրավաբան, քաղաքացի նաև որպես պատգամավոր ոչ թե կարևորում է ՍԴ դատարանի դատավորների զուտ անձը, այլ այն, թե տվյալ թեկնածուն ընտրվելու դեպքում որքանո՞վ կարող է նպաստել ՍԴ-ի՝ իբրև բարձրագույն դատական ատյանի հեղինակության բարձրացմանը՝ ժողովրդի աչքի առաջ։

«Ես այն կարծիքին չեմ, որ մենք ՍԴ չենք ունեցել, որ ՍԴ-ն բացարձակապես չի գործել օրենքի շրջանակներում, ինչպես ոմանք պնդում են ՍԴ-ի՝ այսպես կոչված թնջուկը իբրև թե լուծելու համար։ Դա այդպես չէ, բայց ցանկացած դատարան ժողովրդի աչքին վեր խոյանալու խնդիր ունի։ Դատարանն էլ պետք է ճկուն լինի՝ ժամանակի փոփոխությանը զուգահեռ։ Ավելի ցանկալի կլինի, որ մենք ունենանք այնպիսի դատարան, որը առավելագույնս վայելի ժողովրդի վստահությունը, ես այդպես եմ կարծում։ Ես ի սկզբանե ինքս էլ եմ հակաօրինական գնահատել ՍԴ այսպես կոչված վերակառուցումը, ապամոնտաժումը։ Ես անձամբ դա գնահատել եմ Սահմանադրությանը հակասող, հիմա այս պայմաններում , թե ԲՀԿ-ն ինչպես կորոշի իրավիճակը՝ ժամանակի հարց է»։

Գևորգ Պետրոսյանն ասում է, որ միշտ էլ, որպես կանոն դատարանի որոշումից մի կողմը դժգոհ է լինում։ Անդրադառնալով այն հարցին, որ Երվանդ Խունդկարյանը նաև Վճռաբեկ Դատարանի նախագահն է, որին առաջարկվում է ՍԴ դատավորի պաշտոն, Պետրոսյանն ասում է, որ սա անձերի խնդիր չէ։

«Եթե Երվանդ Խունդկարյանը թույլ է տվել հանցավոր արարք, կամ այնպիսի իրավախախտում, որը հիմք է նրա նկատմամբ օրենքով նախատեսված պատասախանատվության միջոցներ կիրառելու համար, սա ուրիշ բան, բայց եթե ընդհանուր համակարգից դժգոհ են, ապա այդ ղեկավարը այլ պաշտոն պետք է չզբաղեցնի՞։ Անձամբ ճանաչում եմ Խունդկարյանին, փորձառու դատավոր է։ Ես մի տեսակ կարծիք ունեմ, որ այս իշխանությունները խիստ սուբյեկտիվ մոտեցում են ցուցաբերում կոնկրետ դատավորների նկատմամբ՝ ելնելով նրանից թե տվյալ դատավորը հանրային հետաքրքրություն ներկայացնող գործով ինչպիսի որոշում է կայացնում, որոշում՝ որը իշխանությունների քիմքին հաճելի է, թե տհաճ։ Սրանով պայմանավորված՝ իշխանությունները կամ վարկաբեկում են դատական համակարգը կամ կոնկրետ դատավորներին փառավորում են։ Մենք չպետք է կոնկրետ դատավորին կապենք իշխանության քմահաճույքի հետ։ Մենք պետք է տեսնենք այդ անձի անցյալում կա՞ն այնպիսի դեպքեր, որ կոպտորեն խախտել է գործող օրենսդրությունը, Սահմանադրությունը կամ ակնհայտորեն այնպիսի դատավճիռ է կայացրել, որը հակասում է արդարության սկզբունքներին։ Ճշտելը շատ հեշտ է, ունենք ԱԱԾ, ԲԴԽ, արխիվ։ Եթե Երվանդ Խունդկարյանը հանցագործություն արած լիներ, կարծում էիք ժողովուրդը չէ՞ր իմանա»,- հավելեց Գևորգ Պետրոսյանը։

Աղբյուր` Փաստինֆո