Փաստ ինֆո

Ջերմուկի բնակից, բնապահպան Շիրակ Բունիաթյանը քիչ առաջ ֆեյսբուքյան ուղիղ միացմամբ կոչ արեց բոլորին միանալ Ամուլսարի դեմ պայքարի խմբին.«Մարդիկ ինքնաբուխ կերպով սկսում են հավաքվել Ջերմուկ քաղաքի «Տաքսիների կանգառ» կոչվող հրապարակում։ Տարածքն աստիճանաբար բազմամարդ է դառնում։ Բոլորս ընտանիքի անդամներով հավաքվում ենք այստեղ։ Ովքեր նայում են այս տեսանյութը և ովքեր ցանկություն ունեն ու գտնում են, որ պետք է իրենց մասնակցությունն ունենան այս կարևորագույն հարցում, թող հավաքվեն այստեղ։ Անկախ բնակության վայրից՝ Ամուլսարը բոլորիս խնդիրն է։ Այսօր այն ամենակարևոր օրն է, երբ ֆեյսբուքում շատ մնալու կարիք չկա, պետք է անցնել իրական պայքարին։ Դուրս գանք ֆեյսբուքից և ֆիզիկապես ու իրականում կանգնենք Ամուլսարի կողքին», - ուղիղ միացմամբ հայտնեց Շիրակ Բունիաթյանը։ 

Նշենք, որ այսօր առավոտյան հենց Շ.Բունիաթյանն էր կոչ արել բոլոր ակտիվիստներին՝ հավաքվել տաքսիների կանգառում՝ Ամուլսար գնալու համար։

Մինչ Ջերմուկի բնակիչը Շիրակ Բունիաթյանը կոչով ուղիղ եթերում էր, միաժամանակ նույն վայրում՝ «Տաքսիների կանգառ» կոչվող հրապարակում հնչում էր տարածքում պահպանություն իրականացնող ոստիկանություն հիշեցումն այն մասին, որ ՀՀ տարածքում կորոնավիրուսային վարակով պայմանավորված արգելվում է բազմամարդ հավաքների անցկացումը։
Այսօր ավելի վաղ հայտարարություն տարածվեց այն մասին, որ Ամուլսարի խնդրով մտահոգ ակտիվիստները ավտոերթով գնում են դեպի Ամուլսար։ Շիրակ Բունիաթյանը ֆեյսբուքյան գրառմամբ տեղեկացրել էր, որ Ամուլսարի հարցի ողջ պատասխանատվությունը Նիկոլ Փաշինյանի վրա է. «Ո՛չ Քոչարյանի և ո՛չ էլ Սերժի ժամանակ չի եղել այսպիսի մեծ հանրային պահանջ և դիրքորոշում։
Իսկ հիմա դեմ գնալով ժողովրդին Փաշինյանը ստանձնում է նախկինների եփածի ողջ պատասխանատվությունը»,- մասնավորապես ասվում էր Շիրակ Բունիաթյանը գրառման մեջ։

Այսօր առավոտյան հայտարարություն էր տարածել նաեւ «Լիդիան Արմենիա» ընկերությունը, որով հայտնում էր, որ նախաձեռնել է «Լիդիանի» օրինական տարածքում արդեն մոտ երկու տարի ապօրինի գտնվող վագոն-տնակների հեռացումը ընկերության տարածքից. «Լիդիան Արմենիան» ունի Ամուլսարի տարածքում աշխատանքներ իրականացնելու բոլոր թույլտվությունները, որոնք որևէ կերպ չեն չեղարկվել կամ նույնիսկ ժամանակավոր չեն դադարեցվել։ Ամուլսարում աշխատանքների իրականացման միակ խոչընդոտը եղել է արդեն երկու տարի ապօրինի կերպով «Լիդիանի» տարածք ներխուժած անձանց խումբը։

«Լիդիանը» երկու տարի փորձել է խուսափել բախումներից, ապավինելով օրենքի կիրառմանը, որն այդպես էլ երկու տարվա ընթացքում տվյալ հարցում չկիրարկվեց»,-մասնավորապես ասված է հաղորդագրության մեջ»,- ասվում էր տարածված հաղորդագրության մեջ։
Ընկերությունը միաժամանակ կոչ է արել համայնքների բնակիչներին զերծ մնալ «օրինախախտների հետ բախումներից եւ հորդորել իրավապահ մարմիններին՝ ապահովել տարածքում օրինականության վերականգնումը, կարգի հրավիրել սպառնալիքներ ու բռնության կոչեր անող խմբավորմանը, «այլապես հնարավոր անցանկալի զարգացումների, այդ թվում համայնքում հնարավոր բախումների պատասխանատվությունը կրելու են իրավապահ մարմինները»։

Աղբյուր` Փաստինֆո