Փաստ ինֆո

«Ադրբեջանում ներքին քաղաքականությունը կաթվածահար վիճակում է։ Ոչ ոքի համար գաղտնիք չէ, որ այդ երկրում ընդդիմությունը գլուխ է բարձրացրել և դարձել է լուրջ դոմինանտ ուժ։ Հենց այս հանգամանքով պայմանավորված պետք է վերլուծել տավուշյան սահմանին սկիզբ առած թշնամու վերջին ռազմական ագրեսիան,-«Փաստինֆո»-ի հետ զրույցում ասել է «Արծիվ 30» մահապարտների գնդի փոխհրամանատար Եփրեմ Մարգարյանը՝ անդրադառնալով հայ-ադրբեջանական սահմանին հակառակորդի ձեռնարկած ռազմական ագրեսիային, թե ի՞նչ նպատակ է հետապնդում սրանով մեր թշնամին։ Նրա դիտարկմամբ՝ Ադրբեջանում չգիտեն՝ էլ ինչպե՞ս կարող են ճնշել ներքին խռովությունները և իրենց ժողովրդի ուշադրությունն այլ հարցերի շուրջ շեղելու նպատակով հերթական անգամ արկածախնդրության են դիմում՝ նախահարձակ լինելով մեր սահմաններին»։ 

Ադրբեջանն ի վերջո պետք է հասկանա, որ ուժի և զենքի լեզվով մեզ հետ խոսել չի կարող, դա իր մոտ ոչ մի կերպ չի հաջողվում, ասում է մահապարտ աշխարհազորայինը.«Հայկական զինված ուժերն ամեն անգամ կործանիչ և ավերիչ հարված են հասցնում ադրբեջանական զինուժին, բայց արի ու տես, որ սա ոչ մի անգամ դաս չի լինում խայտառակ պարտություններ կրած թշնամու համար։ Երբևիցե մի անգամ պատահե՞ց, որ հայկական զինված ուժերն այնպիսի խայտառակ պարտություն կրեն, որը քննարկման թեմա դառնա միջազգային հարթակներում, իհարկե ոչ։ Բայց նախահարձակ թշնամին մշտապես ջախջախված հետ է շպրտվում և վերջին մարտերը սրա հերթական ապացույցն էին։ Թե՛ ադրբեջանական, թե՛ թուրքական ամենաբարձրաստիճան զինվորականների շուրթերից Բազմաթիվ անգամներ ռազմատենչ հայտարարություններ ենք լսել, բայց դրանցից ոչ մեկը ինչ օրս գործ չի դարձել, այլ մնացել է զուտ բառերի տիրույթում։

Վերջում էլ լսեցինք, թե իբր ատոմակայանին են ուզում հարվածեն։ Նախ՝ ատոմակայանին հարվածելը միջազգային իրավունքների կոպիտ խախտում է, հետո, եթե նրանք այդպիսի քայլ անեն, պատասխանը չի ուշանա և իրենք այդ մասին շատ լավ գիտեն։ Մենք հնարավորություն ունենք թիրախավորելու և խոցելու այնպիսի կարևորության ստրատեգիական կառույցներ, ինչպիսիք են օրինակ նրանց նավթահորերը, որ հանդիսանում են այդ պետության եկամտի միակ աղբյուրները, Մինգեչաուրը և այլն։ Եվ մի հարց էլ՝ արդյո՞ք այդ խոցման արդյունքում երաշխավորված է, որ Ադրբեջան պետությունը ընդհանրապես կանգուն կմնա...Միաժամանակ հստակ է նաև, որ մենք որևէ վայրկյան չենք թերագնահատում թշնամու հնարավորությունները։ Նրանց կողմից հնչեցված ցանկացած սպառնալիքի պարագայում մեր զինված ուժերը բերվում են առաջին կարգի պատրաստակամության»։

Ադրբեջանական ռազմական ագրեսիան բացառապես այդ երկրի միակողմանի նախաձեռնությունը չի, Ադրբեջանի հետևում Թուրքիան է՝ Իսրայելի, ԱՄՆ-ի ու Անգլիայի ոգեշնչմամբ, ասում է մահապարտ Եփրեմ Մարգարյանը. «Հավանաբար Թուրքիան ուզում է ոգեշնչել իր կրտսեր եղբորը և համատեղ զորավարժություններով ցույց է տալիս նրան, թե ինչպես պետք է կռվել։ Համատեղ զորավարժություններով նրանք ուզում են ցույց տալ նաև, թե, հնարավոր պատերազմի պարագայում, ինչի են ընդունակ երկու պետությունները։ Ինչ վերաբերում է թուրքական կողմի Ադրբեջանին հայտնած բացարձակ աջակցության հայտարարություններին, ապա սա պետք է դիտարկել որպես բացառապես միայն իսլամական քարոզի տրամաբանության մեջ։ Ոչ մեկի համար գաղտնիք չէ, որ թուրքերն առհասարակ չեն հրաժարվում մեծ թուրանի իրենց գաղափարից, իսկ դրան հասնելու ամենահեշտ աշխատող միջոցը՝ Ադրբեջանի անընդհատ հրահրումն է մեր դեմ»։

Նախիջևանյան զորավարժությունների բեմականացված մեկնարկն, ըստ Եփրեմ Մարգարյանի, հաղորդագրություն էր Ռուսական կողմին. «Օգոստոսի 10-ին լրանում է Սևրի պայմանագրի 100 - ամյակը, հենց նույն օրն էլ ավարտվում են նախիջևանյան զորավարժությունները։ Օրերի համընկնումը պատահականություն չէ։ Այս զորավարժությունները, մեծ իմաստով ազդակ էին Ռուսական կողմին՝ Սևրի պայմանագրի 100 ամյակի ֆոնին։ Սևրի պայմանագրով Հայաստանի համար մոտ 160 հազար քառակուսի կմ տարածքով միջանցք էր նախատեսվում դեպի Սև ծով։ Բնականաբար այստեղ տարածաշրջանի իմաստով մեծ դեր է խաղում Ռուսաստանը և այս հաղորդագրությունն ուղղված էր նաև Ռուսաստանին։ Ի պատասխան այս զորավաժություններին, շուտով կմեկնարկի ռուսական կողմի՝ «Կովկաս 2020» խորագրով զորավարժությունները, որին մեկ գնդի կազմով կմասնակցեն նաև հայկական զինված ուժերը։ Եթե այլ կերպ ձևակերպենք, ապա այստեղ ավելի շուտ շոշափվում են ոչ թե Հայաստանի և Ադրբեջանի, Թուրքիայի և Ռուսաստանի հարցերը, իսկ Թուրքիան դեռ այն պետությունը չի, որ կարողանա իր ուժերի կամ գիտելիքների փորձարկման նպատակով Ռուսաստանի Դաշնության դեմ ռազմական ագրեսիվ հարձակումներ նախաձեռնի և սրանում որևէ կասկած չկա։ Ռուսական կողմը հաշված րոպեների ընթացքում Թուրքիային հողին կհավասարեցնի»։

Անդրադառնալով ղարաբաղա-ադրբեջանական շփման գծի երկայնքով լարվածության վերականգնման հավանականությանը, Եփրեմ Մարգարյանը նկատում է՝ Արցախի սահմանները վտանգված են մնալու այնքան ժամանակ, մինչև դեռ չեն ստացել իրենց վերջնական լուծումն՝ ի օգուտ Հայաստանի և Արցախի Հանրապետությունների.«Ինչպես հասկանում ենք՝ դիվանագիտությունն այս ուղղությամբ դեռ նկատելի քայլեր չի անում։ Բոլոր կողմերից հնչում են խաղաղասիրական կոչեր, իսկ մեր թշնամին այդ կոչերին ի պատասխան ցույց է տալիս իր ռազմական ագրեսիան։ Վերջերս Ալիևը հոխորտաց՝ թե կարո՞ղ եք մեզ հետ դեմ առ դեմ կռվեք։ Ուրեմն, մենք միշտ պատրաստ ենք դեմ առ դեմ կռվելու։ Թող Հայաստանն, Արցախն ու Ադրբեջանը դեմ առ դեմ դուրս գան ու բոլորը կտեսնեն, թե ինչ տեղի կունենա։ Ադրբեջանը կրկին ծնկաչոք հրադադար է աղաչելու։ Վերջին իրադարձություններն էլ ապացուցեցին, որ մեր բանակը մարտունակ է, իսկ Արցախի հարցում՝ արցախցին երբեք հող չի տա, եթե չվերցնի, նա հող չի տա։ Բոլոր քաղաքական գործիչները, ովքեր Արցախի հիմնահարցի բանակցային գործընթացի մեջ են, պետք է շատ լավ իմանան՝ «Ոչ մի թիզ հող» գաղափարախոսությունը, որի կրողներին Լևոն Տեր Պետրոսյանը որակեց որպես ազգի գերեզմանափորներ, այդ գաղափարախոսությունը կանգ չի առել, առաջ է գնում, որովհետև մենք չենք պատրաստվում Արցախը հանձնել»։

Զրույցի ավարտին՝ ո՞րն է պատերազմական իրավիճակներում մահապարտի թիվ մեկ առաքելությունը հարցին՝ «Արծիվ 30» մահապարտների գնդի փոխհրամանատար Եփրեմ Մարգարյանը պատասխանում է. «Առհասարակ մենք մի գաղափարախոսություն ունենք՝ «Մահն իմացյալ՝ անմահություն է», բայց լինել մահապարտ, առաջին հերթին նշանակում է ողջ մնալ և հաղթանակ տանել։Իսկ եթե կյանքդ հայրենիքին պետք է, ապա պետք է տաս, որովհետև մենք դա համարում ենք սուրբ գործ»։

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո