Փաստ ինֆո

Հայաստանի Հանրապետությունը ադրբեջանական հաքերների կիբերահարձակումների թիրախում է հայտնվել։ Նախ՝ վտանգվեց առողջապահական անվտանգությունը՝ հակառակորդը հասանելիություն ստացավ հիվանդների տվյալներին, հետո ձեռք բերեցին հեռախոսահամարների բազաները, իսկ սահմանային լարված իրավիճակին զուգահեռ, հարևան Ադրբեջանը պարբերաբար հարձակման ենթարկեց պետական համակարգերը սպասարկող ոլորտների՝ ՀՀ Կառավարության և վարչապետի պաշտոնական կայքերը, տարբեր տեղեկատվական բազաները, կեղծ հաղորդագրություններով փորձեց խուճապ առաջացնել հանրության շրջանում։

Այսօր առավոտյան տեղեկատվության անվտանգության մասնագետ Սամվել Մարտիրոսյանը տեղեկացրեց, որ ադրբեջանական հաքերները հայտարարել են ՀՀ կառավարական ներքին ցանց ներթափանցելու և այնտեղից 55 տերաբայթ ծավալով տեղեկատվություն տանելու մասին. «Մի հարցրեք ինձ, սա ճիշտ է, թե սխալ։ Ես տեղյակ չեմ։ Պարզապես լավ կլիներ լսել մեկնաբանություններ և հասկանալ, թե վերջապես ե՞րբ է Հայաստանը ունենալու կիբերանվտանգության միասնական կենտրոն, ե՞րբ է հարց դրվելու կրիտիկական ենթակառուցվածքների պաշտպանության մասին, - գրում է Սամվել Մարտիրոսյանը և հավելում,- վերջապես ե՞րբ ենք մենք լսելու, որ ինչ-որ մեկը բառադիության համար պատասխանատու է ճանաչվելու։ Էսքան արտահոսքերի եղան, մի անգամ չլսեցինք, որ հայտնաբերվել է արտահոսքի պատճառը և պատասխանատուն։ Եթե այս արտահոսքը իրականում եղել է, ապա չորս ոտքով կղանքի մեջ ենք»,- պատկերավոր արտահայտվել էր կիբերանվտանգության մասնագետը։

Մինչ «Փաստինֆո»-ն փորձում էր ողջ աշխատանքային օրվա ընթացքում կապ հաստատել վարչապետի մամուլի խոսնակ Մանե Գևորգյանի հետ՝ պարզելու թշնամու կիբերտեսադաշտում այսօրինակ թափանցիկ դառնալու վտանգավոր պատճառների հանգամանքները, ինչպես նաև հասկանալու՝ ի՞նչ աշխատանքներ է իրականացվում արդեն տևական ժամանակ կիբերհարձակումների թիրախում հայտնված պետական համակարգերի վերահսկողությունն ուժեղացնելու համար, որպեսզի մի օր էլ հանկարծ ռազմական գաղտնիք պարունակող տեղեկությունները չհայտնվեն հակառակորդի ձեռքերում՝ Սամվել Մարտիրոսյանը կատարեց երկրորդ գրառումը։ Այս անգամ, պարզվում է, թշնամու հաքերային հարձակման զոհ էին դարձել ռազմավարական կարևորագույն նշանակության օբյեկտի՝ «Զվարթնոց» միջազգային օդանավակայանի աշխատակիցների անձնական տվյալները. «Ասեմ ձեզ, որ ադրբեջանական հաքերները (արդեն խնդալս գալիս ա էս բառակապակցությունը տպելուց) հրապարակել են Զվարթնոց օդանավակայանի մի քանի տասնյակ աշխատակիցների տվյալները։ Նենց չի, որ շատ վախենալու դեպք ա, բայց դե արդեն կարծես վարյետեում տոմս ծախող լինեմ»,- նշում է մասնագետը։

Ցավալի է, բայց փաստ, որ արդեն տևական ժամանակ ադրբեջանական կողմից կիբերհարձակումների ենթարկված պետական կառույցների, ինչպես նաև մասնավոր օգտահաշիվները հասանելի դարձնելու դեպքերի առթիվ որևէ քրեական գործ չի հարուցվել։ Համապատասխան մարմինների կողմից, կարծես, քննության չեն ենթարկվել նաև կիբերանվտանգության ոլորտը թշնամու թիրախում այսքան հասանելի դարձող հանգամանքները, չեն հայտնաբերվել և պատասխանատվության չեն կանչվել ոլորտում անթույլատրելի բացթողումներ թույլ տված աշխատակիցները։

Հայտնի է, որ Հայաստանի Հանրապետությունում պետական համակարգերի և կառույցների կիբերանվտանգության պաշտպանության իրականացումը վերապահված է Ազգային Անվտանգության Ծառայությանը։ Ինչո՞ւ և ինչպիսի պայմաններում է ՀՀ-ում կիբերանվտանգության ոլորտը հայտնվել թշնամի պետության թիրախում և ինչո՞ւ ոլորտում պատշաճ կարգով վերահսկողություն չի սահմանվում, ովքե՞ր են վտանգավոր բացթողումների պատասխանատուները և արդյո՞ք Ազգային Անվտանգության Ծառայությունը պատրաստվում է հետաքննություն իրականացնել՝ ստանալու համար հնչեցված մտահոգիչ հարցերի պատասխանները՝ կապ հաստատեցինք ԱԱԾ մամուլի և հասարակայնության բաժնի ղեկավար, գնդապետ Արթուր Գևորգյանի հետ։ Մեզ հետ զրույցում պարոն Գևորգյանը չկիսեց այն կարծիքը, որ ՀՀ-ում պետական կառույցները հայտնվել են ադրբեջանական կողմի հաքերների թիրախավորված հարվածների տակ, իսկ պատշաճ վերահսկողության հետ կապված հարցին պատասխանեց շատ կարճ՝ ԱԱԾ-ն շարունակում է աշխատանքները՝ պարզելու ստեղծված իրավիճակի հանգամանքները։

«Հավելյալ տեղեկատվության պարագայում, ԱԱԾ-ն հանդես կգա համապատասխան հայտարարությամբ», - «Փաստինֆո»-ի հետ զրույցում ասաց գնդապետ Արթուր Գևորգյանը։

Մնում է հուսալ միայն, որ այսօր ադրբեջանական հաքերային հարձակման հետևանքով ՀՀ կառավարության սերվերների ղեկավարման համակարգից կորզված մեծածավալ տեղեկատվության տիրապետումը որևէ կերպով վտանգի տակ չի դնի Հայաստանի Հանրապետության շահերը, իսկ ԱԱԾ-ին վերջապես կհաջողվի պարզաբանել՝ ինչու ենք այսքան խոցելի դարձել թշնամու համար։

Հեղինակ՝ Նվարդ Մանվելյան

Աղբյուր` Փաստինֆո