Փաստ ինֆո

«Կանաչ ապագա» բնապահպանական շարժման ղեկավար Վահագն Վարագյանը բերման ենթարկվեց Ամուլսարի պահնորդական կետի տարածքից, որտեղ հանքի շահագործման դեմ պայքարող քաղաքացիները բողոքի ակցիա են իրականացնում:

Նախքան բերման ենթարկվելը Վայոց Ձորի ոստիկանապետ Գևորգ Ազիզյանի հետ երկխոսություն տեղի ունեցավ և նրան հորդորեց իր հետ «դու»-ով չխոսել և բացել ճանապարհը: Այդ երկխոսությունից հետո քիչ անց Վարագյանը բերման ենթարկվեց:

Հանքի շահագործման դեմ ակցիան շարունակվում է, քաղաքացիները հորդորում են ոստիկանությանը ուժ չկիրառել: Ոստիկանությունը քաղաքացիներին էլ կոչ էր անում հեռանալ հավաքի վայրից, իսկ ոստիկանի օրինական պահանջը չկատարելու դեպքում կենթարկվեն պատասխանատվության, հորդորում էին պահել սոցիալական հեռավարություն։
Ջերմուկում իրավիճակը պարբերաբար թեժանում է, պարբերաբար քաղաքացիներ են բերման ենթարկվում։ Իրավիճակը շարունակում է գերլարված մնալ: Նշենք, որ ոստիկանական հատուկ գործողությունների արդյունքում մի քանի քաղաքացիների ինքնազգացողությունը վատացավ:

Ամուլսարի հանքի շահագործման դեմ դուրս են եկել մի խումբ քաղաքացիներ՝ 6 կիլոմետրանոց ավտոերթով։ Ոստիկանները նրանց հորդորում են բացել Ջերմուկ քաղաք տանող ճանապարհը, սակայն քաղաքացիները ոստիկանների պահանջին չեն ենթարկվում։
Հիշեցնենք, որ այսօր առավոտյան Ամուլսարի պահապանները հայտնել էին ,որ «Լիդիան» ընկերության վարձած նոր պահնորդական ծառայությունը Ամուլսարի պահապանների վագոն-տնակները հանել է ու փոխարենը դրել իրենցը: Ավելի ուշ ընկերությունը հայտարարություն տարածեց առ այն, որ նախաձեռնել է «Լիդիանի» օրինական տարածքում արդեն մոտ երկու տարի ապօրինի գտնվող վագոն-տնակների հեռացումը ընկերության տարածքից։

Ընկերությունը կոչ էր արել իրավապահ մարմիններին՝ ապահովել տարածքում օրինականության վերականգնումը, կարգի հրավիրել սպառնալիքներ ու բռնության կոչեր անող խմբավորմանը, «այլապես հնարավոր անցանկալի զարգացումների, այդ թվում համայնքում հնարավոր բախումների պատասխանատվությունը կրելու են իրավապահ մարմինները»։

Աղբյուր` Փաստինֆո