Փաստ ինֆո

Ռուսաստանի 40-ից ավելի բուհեր եւ գիտական ինստիտուտներ ստացել են բազմամիլիոնանոց դրամաշնորհներ՝ կրթության եւ գիտության նախարարության մրցույթի արդյունքներով: Այս մասին հայտնում է գերատեսչության կայքը։

Նշվում է, որ մրցույթին ընդհանուր առմամբ ներկայացվել է 367 հայտ գիտական եւ կրթական կազմակերպություններից: Արդյունքում՝ հաղթանակը շնորհվեց 41 մասնակցի։ Դրամաշնորհի առավելագույն գումարը կկազմի 300 մլն ռուբլի։ Ընդ որում, ֆինանսավորումը կիրականացվի մինչեւ 2023 թվականը։

ԿԳ նախարարության մրցույթին կարող էին դիմել ապրիլի 30-ից մինչեւ մայիսի 28-ը: Մասնակիցներ կարող էին լինել մաթեմատիկական, համակարգչային եւ տեղեկատվական գիտությունների, ֆիզիկայի եւ աստղագիտության, քիմիայի եւ նյութի գիտության, հողի եւ շրջակա միջավայրի մասին գիտության, կենսաբանական գիտությունների, էներգետիկայի, մեխանիկայի եւ մեքենաշինության, բժշկության, գյուղատնտեսական գիտությունների, ինչպես նաեւ սոցիալական եւ հումանիտար գիտությունների ոլորտներում խոշոր գիտական նախագծեր ներկայացրած կազմակերպությունները:

Այս նախաձեռնությունն իրականացվում է «Գիտություն» ազգային ծրագրի շրջանակներում՝ նախագահ Վլադիմիր Պուտինի նախաձեռնությամբ։ Ընդամենը դրա իրականացման համար նախատեսվում է հատկացնել ավելի քան 625 մլրդ ռուբլի։ Այն, մասնավորապես, նախատեսում է երկրում համաշխարհային մակարդակի 15 գիտակրթական կենտրոնների ստեղծում, «մեգասայենս» դասի գիտական սարքավորումների շահագործման հանձնում և գիտական ու գիտամանկավարժական կադրերի պատրաստման ամբողջական համակարգի ձևավորում։

Աղբյուր` Փաստինֆո