Փաստ ինֆո

33-րդ թաղամասի շինարարական ծրագրի աշխատանքային խմբի ղեկավար Վարագ Սիսեռյանի ֆեյսբուքյան էջում տեղադրված՝ Ֆիրդուսի թաղամասի եռաչափ պատկերը որքանո՞վ է վկայում կառուցապատման այն դրական փոփոխությունների մասին, որոնց վերաբերյալ վաղօրոք հայտնել էր Սիսեռյանը: 

Այն, որ այս ծրագրով տարածքում առկա հուշարձան-շենքերը ինչպես կան, պահպանվելու են՝ հայտնի էր ի սկզբանե: Տարբերությունը, թերևս այն է, որ նոր հայեցակարգով արդեն հստակ է՝ նրանք Ֆիրդուսիում դոմինանտ են:

Ֆեյսբուքյան տիրույթում բազմաթիվ դրական արձագանքների արժանացած Ֆիրդուսիի եռաչափ պատկերն, ինչ խոսք, խնդրո առարկա թաղամասի ամբողջական պատկերը դեռ չի տալիս, այլ միայն՝ Հանրապետության փողոցի հատվածը՝ հարակից հուշարձաններով, որոնք պահպանվելու են իրենց տեղերում, այժմ նաև՝ փայտե կախովի պատշգամբներով, շենքերի բակային ճակատներով յուրահատուկ կոլորիտ ու հարազատություն հաղորդելով:

Ֆեյսբուքյան գրառումները փաստում են, որ երևանցիներին դուր է եկել Երևանի կենտրոնում գտնվող Ֆիրդուսի թաղամասի ապագա կերպարը:

Թաղամասի կերպարանափոխության ՝ «գեղեցիկ է», «ընտիր է», «այ սա ուրիշ բան է», «շատ սիրուն է, նոր ոճ և կոլորիտ», «նման թաղամասի կարիք մեր Երևանն ունի», «գեղեցիկ է՝ հրաշք ծրագիր, հիանալի լուծում», «գեղեցիկ նախագիծ՝ Երևանին բնորոշ առանձնահատկությամբ», «մեր քաղաքին շատ է սազում, էն փլփլված զիբիլանոցից կպրծնենք», «ինչպիսի՜ կանաչություն, ինչպիսի՜ կոլորիտ» և նման բնորոշումները մեր քաղաքացիներինն են:

Մեր քաղաքացիներինն են նաև քոմենթների մեջ հանդիպող այն մտահոգությունները, թե՝ տեսանյութում ցուցադրվածը Ֆիրդուսիից մի կտոր է, սակայն Տիգրան Մեծի հատվածը, դալաններով բակերը ցույց չեն տրված, ի հավելումն՝ կառուցվելիք բարձրահարկերով հրապարակը, և այլն: Այն, որ Տիգրան Մեծի հատվածը ներառված չէ այս տեսանյութում, չի նշանակում, թե շրջանցվել է տվյալ հատվածը: Ավելին, այն նույնպես կառուցապատողների հետ բանակցությունների համատեքստում փոփոխությունների է ենթարկվել և առաջիկայում նոր տարբերակը կներկայացվի մեր քաղաքացիներին:

Անշուշտ, քննադատական հայացքով մեկնաբանություններ նույնպես կան, սակայն դրանց հիմնական մասը տարածքի կանաչությանն ու կանաչապատմանն է վերաբերվում, ընդ որում, այս համատեքստում՝ համեմատություն է անցկացվում Հյուսիսային պողոտայի հետ: Որքան էլ ցավալի, այնուհանդերձ, ճշմարտություն է՝ Հյուսիսայինն առայսօր կանաչի, ֆլորիստիկական լուծումների և փոքր ճարտարապետական ձևերի առումով դեռ ավարտուն տեսք չի ստացել:

Ինչ վերաբերվում է Ֆիրդուսի թաղամասին, ապա մեզ վստահեցնում են՝ թե՛ ֆլորիստիկ դիզայնի, թե՛ ճարտարապետական փոքր ձևերի հարցը կարևորվում է, և այս առումով նույնպես երևանցիները հուսախաբ չեն լինի:

Դե, իսկ անձնավորված մոտեցումներ ու տեսակետներ ունեցողներ միշտ եղել են ու կլինեն, սակայն դա արդեն այլ խոսակցության նյութ է:

Հեղինակ՝ Ա.Ե.

Աղբյուր` Փաստինֆո