Փաստ ինֆո

Թուրքիայի կողմից Հայաստանի տարածք տեսչական այցերի կասեցումը մեր համաչափ արձագանքն էր այն գործողություններին, որ այսօր իրականացնում են Թուրքիան և Ադրբեջանը միասին՝ նախաձեռնելով ու իրականացնելով այս վարժությունները, որոնք տեղի են ունենում այն ժամանակ, երբ մեր ամբողջ ռեսուրսը ներդրվում է դեէսկալացիայի ամրապնդման վրա։ Այս մասին «Շանթ» հեռուստաընկերությանը տված հարցազրույցի ժամանակ ասաց ՀՀ արտաքին գործերի նախարար Զոհրաբ Մնացականյանը։

Արտգործնախարարը նկատեց՝ Վիեննայի փաստաթղթից բխող ռազմական այդ ինսպեկցիաներն իրենց մեջ պարունակում են էական գործիք։ Դա փոխվստահության ձևավորման և անվտանգային շահերի հավասար, փոխադարձ հարգանքի գործիք է։ Զոհրաբ Մնացականյանի խոսքով այն, ինչ անում է Թուրքիան, ի ցույց չի դնում նման փոխադարձ հարգանք և Հայաստանի տարածք տեսչական այցերի կասեցումը փոխադարձ քայլն էր Հայաստանի կողմից։

Անդրադառնալով ԵԱՀԿ Մինսկի խմբի համանախագահների հայտարարություններին, Զոհրաբ Մնացականյանն ասաց, որ հուլիսի 12-ից սկսած ժամեր անց անմիջապես կապի մեջ են եղել համանախագահների հետ և նրանք ակտիվ ներգրավված էին. «Ցանկացած ժամի, ցանկացած պահի մենք աշխատում էինք միասին։ Աշխատում էինք մեկ նպատակի համար՝ ապահովել դեէսկալացիա, վերականգնել զինադադարը, վերականգնել այն իրավիճակը, որ մեզ չի տանի էլ ավելի խորացած ճգնաժամի։ Երեք անգամ փորձել ենք ձևավորել այդ զինադադարի վերականգնումը, երրորդ անգամվանից սկսած դա ավելի արդյունավետ է դարձել։ Համանախագահները շատ համակարգված են եղել, մասնավորապես ՌԴ-ի համանախագահողը»,-ասաց նախարարը։

Դիտարկմանը, որ մնացած համանախագահները կարծես այս հարցերում այդքան էլ ակտիվ չեն, Զոհրաբ Մնացականյանն ասաց, որ գուցե ինչ-որ չափով տպավորություն է. «Ռուսաստանը բավական ակտիվ ներգրավված է եղել։ Ռուսաստանը չափազանց համակարգված ձևով է աշխատել Ֆրանսիայի և ԱՄՆ-ի հետ։ Շատ ակտիվ աշխատել եմ բոլոր երեք համանախագահների հետ»,-հավելեց Զոհրաբ Մնացականյանը։

Աղբյուր` Փաստինֆո