Փաստ ինֆո

«Ես Ադրբեջանի ԱԳ նոր նախարարի հետ անմիջապես շփումներ չեմ ունեցել պարզ պատճառներով»: Այս մասին «Հեռանկար» հաղորդաշարին տված հարցազրույցում նշել է Հայաստանի ԱԳ նախարար Զոհրաբ Մնացականյանը:

«Մեզ համար այժմ շատ էական է, որպեսզի մենք լավագույնս ամրագրենք այս դեէսկալացիան և նախապատրաստվենք մեր աշխատանքի հաջորդ փուլին: Ես հիշեցնեմ, որ նախորդ մեր հանդիպումը հունվարի վերջին էր, և մենք բոլոր ուղղություններով ունեինք բավական երկար, բովանդակալից և խորքային աշխատանք: Եվ պետք է անցնեինք հաջորդ փուլերին, որին մենք բացարձակապես պատրաստ էինք, բոլոր այն ուղղություններով, որոնց մասին ես խոսում էի»,-ասել է նախարարը՝ ճշտելով, որ խոսքը Ադրբեջանի արդեն նախկին նախարար Էլմար Մամեդյարովի հետ՝ գարնանը պատրաստվող հանդիպման մասին է:

«Այդ հանդիպումը ի դեպ, պետք է լիներ դեռևս գարնանը. մենք այդպես էինք նախատեսում: Բայց այս համավարակը իրապես խանգարեց և բերեց նոր իրողությունների, նոր զարգացումների, ներքաղաքական տարբեր արտահայտումների, նաև այս իրավիճակին հենց Ադրբեջանում: Նորից ուզում եմ կրկնել, որ մեզ՝ որպես հարմար թշնամի օգտագործելը անընդունելի է, անարդյունավետ է և շատ ավելի օգտակար է, եթե Ադրբեջանը կարողանա ավելի արդյունավետ անդրադառնա իր ներքաղաքական հարցերին, իր ժողովրդավարության, մարդու իրավունքների, կոռուպցիային առնչվող հարցերին ինքնուրույն, առանց մեզ օգտագործելու որպես հարմար թշնամի։ Ինչ վերաբերվում է նոր նախարարին, ես առիթը չեմ ունեցել իրեն հանդիպելու, ես, իհարկե, սպասում եմ այդ հանդիպմանը:

Սկզբունքորեն պատիվ ունեմ այսօր քաղաքական պատասխանատվություն կրելու, տանելու այս բանակցային գործընթացն արտաքին գործերի նախարարների մակարդակով: Ես արտահայտել եմ այն բոլոր մոտեցումները, որոնք Հայաստանի դիրքորոշման հիմքում են, և պատրաստ եմ աշխատել յուրաքանչյուրի հետ, իհարկե, համաչափ պատասխանատվություն կրող անձի, արտաքին գործերի նախարարի հետ՝ այս գործընթացն առաջ տանելու համար, անկախ նրանից, թե ով է այդ անձը: Բնականաբար, ակնկալում եմ, որ գործ կունենամ կառուցողական և պատասխանատու անձի հետ, որի հետ ես կսկսեմ աշխատել»:

Աղբյուր` Փաստինֆո