Փաստ ինֆո

Կառավարությունը ռեստորանային ոլորտի ներկայացուցիչների հետ մի քանի շաբաթ տևած բանակցությունների արդյունքում որոշել է համաֆինանսավորել ռեստորանների աշխատավարձային ֆոնդը։

Ռեստորանների հայկական միության նախագահ Վահե Գևորգյանը «Փաստինֆո»-ի հետ զրույցում ասաց, որ այս ոլորտում կարևոր է մարդկային գործոնը, այն է՝ աշխատատեղերի պահպանումը, հետևաբար այս ուղղությամբ անհրաժեշտ էր իրականացնել ոչ թե մեկանգամյա աջակցության ծրագիր, այլ երկարաժամկետ. «Գումարը ռեստորաններին է տրվելու, և ռեստորաններն այդ գումարն օգտագործելու են աշխատատեղերը պահպանելու համար։ Ինչ-որ X ռեստորան ամսական որոշակի գումար է ծախսում իր աշխատողներին վարձատրելու համար։ Պատկերացրեք, որ այդ գումարի մի մասն անվարձահատույց, այսինքն որպես դրամաշնորհ կառավարությունն է տրամադրելու իր կողմից։ Այսինքն` բիզնեսի վրայից այդ բեռը թեթևացնելու է։ Դա մեծ աջակցություն է բիզնեսին և լինելու է ոչ թե մեկ ամիս, այլ բավական երկար ժամանակ, մինչև սահմանները կբացվեն, զբոսաշրջային հոսքեր կլինեն»,-ասաց Վահե Գևորգյանը։

Թե որքան է կառավարությունը պատրաստվում համաֆինանսավորել՝ նրա փոխանցմամբ հաջորդ շաբաթ ավելի պարզ կլինի, այժմ դեռ աշխատանքային գործընթացում են։ Վահե Գևորգյանը կարևորեց այն, որ սկզբունքային համաձայնություն է կայացվել, և այդ աջակցությունը շոշափելի է լինելու. «Խոսքը չի գնալու ինչ-որ սիմվոլիկ մի քանի տոկոսի մասին, այլ բավականին լուրջ տոկոսի մասին։ Սա լավ օրինակ է, թե պետությունն ինչպես է կարևոր հարցով բիզնեսի հետ համագործակցում»,-նշեց Վահե Գևորգյանը։

Հարցին՝ կա՞ արդյոք վիճակագրություն, թե այս ընթացքում հանրային սննդի ոլորտում որքա՞ն մարդ է գործազուրկ դարձել, Վահե Գևորգյանն ասաց, որ իրենց միության անդամների մեծ մասը թեթև օպտիմիզացիա է իրականացրել։ Ռեստորանների հայկական միության անդամների 80 տոկոսից ավելին գնացել է աշխատատեղերը պահպանելու ուղղությամբ. «Հնարավոր է՝ ինչ-որ մարդու աշխատաժամը կրճատվել է՝ ելնելով ծանրաբեռնվածության պակասից, բայց նրանք աշխատել են տեղերը պահել։ Ընդհանուր մոտ 15-20 տոկոսով է եղել այսպես կոչված ժամանակավոր դադարը»,-ասաց Վահե Գևորգյանը։

Վերջինս հավելեց՝ դեռ մայիսին հռչակագիր էին ընդունել, որով վարձատուներին կոչ էին արել զեղչային համակարգ կիրառել և նրանց մեծ մասը դրական է արձագանքել այս կոչին. «Մենք առաջարկել էինք մինչև 50 տոկոսը դիտարկել որպես հնարավոր զեղչ։ Մեկը 20 տոկոս է կիրառել, մեկը 30, 50։ Այն ժամանակ, երբ ոլորտը փակ էր, եղել են վարձատուներ, որ ընդհանրապես գումար չեն վերցրել։ Այսինքն` փոխզիջումային, գործընկերային հարաբերություններ են»,-ասաց Վահե Գևորգյանը։

Ինչ վերաբերում է ռեստորանային ոլորտի շրջանառությանը, ապա այս ընթացքում շրջանառության մոտ 65-70 տոկոս անկում է գրանցվել։

Շրջանառության անկումն ավելի շատ է հայկական ազգային խոհանոց ունեցող ռեստորանների մոտ, ինչը Վահե Գևորգյանը պայմանավորեց երկու գործոնով. «Այդ ռեստորաններն ավելի շատ զբոսաշրջային այցելուներ էին ունենում, իսկ հիմա զբոսաշրջիկ չկա։ Մյուս գործոնն էլ մեծ միջոցառումներն են՝ հարսանիքներ, ծնունդներ, կնունքներ, որոնք այժմ չեն անցկացվում։ Այդ առումով հայկական խոհանոցով ռեստորանները հնարավոր է՝ ավելի շատ են տուժել, օրինակ 80 տոկոս անկում ունեն»,-եզրափակեց Վահե Գևորգյանը։

Հիշեցնենք, որ երեկ՝ հուլիսի 31-ին, վարչապետը հանդիպում է ունեցել ռեստորանային ոլորտի ներկայացուցիչների հետ և հայտարարել, որ կառավարությունն օժանդակություն կցուցաբերի ռեստորանային բիզնեսին աշխատատեղերի պահպանման գործում։

Աղբյուր` Փաստինֆո