Փաստ ինֆո

«Քրեակատարողական բժշկության կենտրոն» ՊՈԱԿ-ը թույլատրել է ՀՀ երրորդ նախագահ Սերժ Սարգսյանի եղբորորդուն՝ Նարեկ Սարգսյանին, տեղափոխվել քաղաքացիական հիվանդանոց՝ հետազոտությունների՝ անհրաժեշտության դեպքում բուժման համար, սակայն վերջինս հրաժարվել է։ Այս մասին «Փաստինֆո»-ն տեղեկացավ ՀՀ արդարադատության նախարարության տեղեկատվության և հանրային կապերի բաժնի պետ Լուսինե Մարտիրոսյանից։

Ինչպես ավելի վաղ հայտնել ենք՝ Նարեկ Սարգսյանի պաշտպանը միջնորդություն էր ներկայացրել՝ Նարեկ Սարգսյանին ՀՀ արդարադատության նախարարության «Քրեակատարողական բժշկության կենտրոն» ՊՈԱԿ-ից քաղաքացիական հիվանդանոց տեղափոխելու մասին։ Սարգսյանը ցանկանում էր սեփական միջոցների հաշվին քաղաքացիական հիվանդանոց տեղափոխվել՝ ստացիոնար ստուգումների և հետագա հնարավոր բուժման համար։

Հիշեցնենք, որ 2018 թվականի հունիսի 26-ին ՀՀ Ազգային անվտանգության ծառայությունում քրեական գործ էր հարուցվել՝ քրեական օրենսգրքի ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, իրացնելու, պահելու, փոխադրելու կամ կրելու և թմրամիջոցների, հոգեմետ (հոգեներգործուն) նյութերի և դրանց պրեկուրսորների ապօրինի շրջանառությունն իրացնելու կամ պատրաստելու նպատակով կամ դրանց ապօրինի իրացնելու հատկանիշներով: Հուլիսի 6-ին Նարեկ Սարգսյանի նկատմամբ հայտարարվել էր հետախուզում, հուլիսի 24-ին՝ միջազգային հետախուզում:

Ոստիկանության տարբեր ստորաբաժանումներ, ինչպես և ՀՀ-ում Ինտերպոլի ազգային կենտրոնական բյուրոն, համագործակցելով եվրոպական մի շարք երկրների իրավապահ կառույցների ու Ինտերպոլի հետ, ծավալուն օպերատիվ-հետախուզական միջոցառումների շնորհիվ, դեկտեմբերի 6-ին Պրահայում հայտնաբերել էին ՀՀ իրավապահ մարմինների կողմից միջազգային մակարդակով հետախուզման մեջ գտնվող Նարեկ Ալեքսանդրի Սարգսյանին: 2019 թ. դեկտեմբերի 21-ին ոստիկանության ծառայողների ուղեկցությամբ Սարգսյանը Չեխիայից տեղափոխվեց Հայաստան:

Հեղինակ՝ Իզաբել Սահակյան

Աղբյուր` Փաստինֆո