Փաստ ինֆո

Կարեն Դեմիրճյանի անվան մարզահամերգային համալիրում ՀՀ դատավորների ընդհանուր ժողովն ավարտել է թեկնածուների ընտրության փուլը:Այս մասին «Փաստինֆո»-ի հարցմանն ի պատասխան հայտնեց Դատական դեպարտամենտի մամուլի և հասարակայնության հետ կապերի ծառայության պետ Արման Խաչատրյանը:

Նրա փոխանցմամբ՝ այժմ ընթանում է քվեաթերթիկների մշակման փուլը, քվեաթերթիկները պետք է մշակվեն: Խաչատրյանն ասաց, որ նիստը շարունակվելու է, տեղի է ունենալու նաև ԲԴԽ անդամի ընտրված դատավորի երդման արարողությունը: Խաչատրյանի խոսքով՝ Վճռաբեկ դատարանի նախագահ Երվանդ Խունդկարյանի անունից լիազորված է ասելու, որ նա, որպես ժողովը նախագահող, պատրաստ է հանդիպել ԶԼՄ ներկայացուցիչների հետ և ներկայացնել ընտրությունների արդյունքները, եթե աշխատանքային ծանր փուլը կամ օրվա ուշ ժամը չխոչընդոտի:

Հիշեցնենք, որ այսօր՝ ժամը 11:30-ից Մարզահամերգային համալիրում ընթանում է ՀՀ դատավորների ամենամյա ժողովը, որին մասնակցում է 180 դատավոր: Նիստի օրակարգում են ՍԴ դատավորի թեկնածուի, ԲԴԽ դատավոր անդամի, դատավորների գործունեության գնահատման և ուսումնական հարցերի հանձնաժողովների դատավոր չհանդիսացող անդամների թեկնածուների ընտրության հարցերը:

ՍԴ դատավորի թեկնածու առաջադրելու դիմում են ներկայացրել ՀՀ վճռաբեկ դատարանի նախագահ Երվանդ Խունդկարյանը և Տավուշի մարզի ընդհանուր իրավասության դատարանի դատավոր Արման Կուրեխյանը: ԲԴԽ դատավոր անդամի թափուր տեղի համար դատական դեպարտամենտը ներկայացրել էր Վճռաբեկ դատարանի քաղաքացիական և վարչական պալատի երեք դատավորի՝ Գոռ Հակոբյանի, Սուրեն Անտոնյանի, Ստեփան Միքայելյանի թեկնածությունները, սակայն երեկ հայտնի դարձավ, որ ԲԴԽ դատավոր անդամի թեկնածուներից Սուրեն Անտոնյանը բարեվարքության հարցաթերթիկ չի ներկայացրել։

Աղբյուր` Փաստինֆո