Փաստ ինֆո

Վճռաբեկ դատարանի դատավոր Սերժիկ Ավետիսյանը մերժել է ՀՀ գլխավոր դատախազի կողմից ներկայացված ինքնաբացարկ հայտնելու մասին միջնորդությունը՝ անհիմն լինելու պատճառաբանությամբ։ Այս մասին տեղեկանում ենք «Դատալեքս» դատական տեղեկատվական համակարգից։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, մասնակի բեկանել է Երևանի ընդհանուր իրավասության դատարանի որոշումը եւ Ռոբերտ Քոչարյանի նկատմամբ որպես խափանման միջոց սահմանել գրավը՝ 2 մլրդ ՀՀ դրամի չափով։ Գումարը վճարվել է եւ նրա խափանման միջոցը փոխվել։

Դատարանի որոշման դեմ վճռաբեկ բողոք է ներկայացրել և դատախազությունը, և փաստաբանական թիմը, և տուժող կողմը։ Գործով զեկուցող է նշանակվել Վճռաբեկ դատարանի քրեական պալատի դատավոր Սերժիկ Ավետիսյանը։ Դատախազությունը դատավոր Սերժիկ Ավետիսյանին ինքնաբացարկ հայտնելու մասին միջնորդություն էր ներկայացրել՝ որպես հիմք նշելով, թե Ռոբերտ Քոչարյանի նկատմամբ որպես խափանման միջոց կիրառված կալանավորումը վերացնելուց և գրավը որպես խափանման միջոց կիրառվելուց հետո, զանգվածային լրատվության միջոցներում տեղեկություններ են հրապարակվել այն մասին, որ գրավի գումարի՝ 2 միլիարդ ՀՀ դրամի մեծամասնությունը վճարել են գործարար Սամվել Կարապետյանը և ևս մի քանի այլ գործարարներ: Ըստ հրապարակումների՝ այդ հանգամանքը հաստատել են և Ռոբերտ Քոչարյանի գրասենյակը և գործարար Սամվել Կարապետյանը: Թեև չի հրապարակվել, թե Սամվել Կարապետյանը 2 միլիարդ ՀՀ դրամի որքան մասն է անձամբ վճարել, սակայն միայն այն հանգամանքը, որ դատարանի որոշումը կայացնելուց հետո 2 օրվա ընթացքում գումարի չափի զգալի մասը վճարվել է Սամվել Կարապետյանի և մի քանի այլ գործարարների կողմից, ողջամտորեն ենթադրվում է, որ վերջինս մտերիմ հարաբերություններ ունի Ռոբերտ Քոչարյանի և նրա ընտանիքի հետ: Այդ կերպ՝ որոշ իմաստով Սամվել Կարապետյանը նաև դատավարական մասնակցություն է ունեցել նրա ազատ արձակմանը:

ՀՀ գլխավոր դատախազը փաստարկել է, որ Սամվել Կարապետյանը դատավորի քենակալն է, ով մշտապես զգալի ֆինանսական օգնություն է ցուցաբերում վերջինիս ընտանիքին: Վերոգրյալը վկայում է, որ Սերժիկ Ավետիսյանը Սամվել Կարապետյանի հետ մտերիմ հարաբերություններ ունի, ով նույնպիսի մտերիմ հարաբերությունների մեջ է գտնվում նաև Ռոբերտ Քոչարյանի հետ և անձնական շահագրգռվածություն է ունեցել վերջինիս նկատմամբ կիրառված խափանման միջոց կալանավորումը փոփոխելու հարցում: Այդ շահագրգռվածությունը հանգեցրել է ընդհուպ նրան, որ Սամվել Կարապետյանը վճարել է կալանավորման այլընտրանք գրավի հսկայական գումարի զգալի մասը: Բացի այդ՝ դատախազությունն էական է համարել նաև այն հանգամանքը, որ դատավոր Սերժիկ Ավետիսյանը Ռոբերտ Քոչարյանի կալանավորման հարցի 2 դեպքերում որպես դատավոր չի ստորագրել ի վնաս Ռոբերտ Քոչարյանի կայացված դատական ակտերը՝ ներկայացնելով հատուկ կարծիք։ Ինքնաբացարկի միջնորդությունը մերժելու մասին որոշման մեջ դատավոր Սերժիկ Ավետիսյանը նշել է, որ Սամվել Կարապետյանն իր քենակալն է և պարբերաբար ֆինանսապես աջակցում է իր ընտանիքին։

Դատավորն անհիմն է համարել այն դատողությունը, որ գրավի զգալի մասը վճարել է Սամվել Կարապետյանը։ Ինչ վերաբերում է իր կողմից ներկայացված հատուկ կարծիքին, ապա դատավորն արձանագրել է, որ ընդգծել, որ դատավորի հատուկ կարծիքը դատավարական ակտ է, սակայն չի սահմանում դատավարության մասնակիցների իրավունքներն ու պարտականությունները, չի առաջացնում դատավարական որևէ հետևանք: Հատուկ կարծիքի առկայությունը, ըստ նրա, վկայում է դատավորի անկախության և դատավարական ազատության մասին, բարձրացնում է կոլեգիալ կազմով գործերը քննող դատարանի հեղինակությունը, նպաստում է գործով ճշմարտության բացահայտմանը, իրավունքի զարգացմանը, օրենսդրության և իրավակիրառ պրակտիկայի կատարելագործմանը:

«Հատուկ կարծիքը նպաստում է դատարանի հեղինակությանը, այն վկայում է կոլեգիալ կազմում ընդգրկված յուրաքանչյուր դատավորի անհատական պատասխանատվության չափի մասին:

Հատուկ կարծիքի առկայությունը վկայում է նաև, որ գործում առկա են վիճահարույց իրավական խնդիրներ, որոնց լուծման համար այլ տարբերակ է առաջարկվում»,- նշել է դատավորը:

Աղբյուր` Փաստինֆո