Փաստ ինֆո

«Բարգավաճ Հայաստան» կուսակցության առաջնորդ Գագիկ Ծառուկյանի խափանման միջոցի վերաբերյալ Վերաքննիչ քրեական դատարանի որոշումը կվիճարկվի Վճռաբեկ դատարանում։ ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը «Փաստինֆո»-ի հետ զրույցում ասաց, որ դատախազությունը պատրաստվում է վճռաբեկ բողոք ներկայացնել, բողոքն այժմ նախապատրաստական փուլում է։

Ինչպես ավելի վաղ տեղեկացրել ենք՝ հունիսի 21-ին Երևանի ընդհանուր իրավասության դատարանը՝ դատավոր Ռոբերտ Պապոյանի նախագահությամբ, մերժեց Ծառուկյանին կալանավորելու միջնորդությունը: Դատարանի այս որոշման դեմ վերաքննիչ բողոք ներկայացրեցին թե դատախազությունը, թե պաշտպանական կողմը։ Վերաքննիչ քրեական դատարանը հուլիսի 8-ին մերժեց փաստաբանների բողոքը, իսկ դատախազության բողոքը մասնակի բավարարեց՝ բեկանելով դատարանի որոշումը և ուղարկելով նոր քննության։
Վերաքննիչ դատարանի այս որոշման դեմ բողոք ներկայացնելու հարցը քննարկվում է նաև Գագիկ Ծառուկյանի փաստաբանական թիմում։ Ծառուկյանի պաշտպան Սմբատ Մինասյանը «Փաստինֆո»-ի հետ զրույցում ասաց, որ Վերաքննիչ դատարանի որոշումը նոր են ստացել, այն, փաստաբանի դիտարկմամբ, բավականին ծավալուն է, կազմված է մոտ 50 էջից։ Իսկ թե ինչն էր ընկած դատարանի նման որոշման հիմքում, փաստաբանը չմանրամասնեց՝ նշելով, որ այժմ նախաքննություն է ընթանում, ուստի մանրամասնել չի կարող, սակայն հայտնեց, որ Վերաքննիչ դատարանը գտել է, որ Առաջին ատյանի դատարանը չի հետազոտել և չի վերլուծել գործում առկա փաստաթղթերը։

«Այսինքն՝ կոնկրետ հանգամանքի հետ չէր կապված, ընդհանրական է, եղել են փաստաթղթեր, որոնք պետք է վերլուծվեին, սակայն չեն վերլուծվել»,- ասաց պաշտպանը։

Մինասյանի խոսքով՝ եթե կողմերից մեկը վճռաբեկ բողոք ներկայացնի, գործը չի կարող գնալ առաջին ատյան՝ նոր քննության։ Նա նաև հայտնեց, որ այս պահին Գագիկ Ծառուկյանի նկատմամբ չկա ընտրված որևէ խափանման միջոց։

Հիշեցնենք, որ ԲՀԿ ղեկավար Ծառուկյանի նկատմամբ հնարավոր հետապնդումների մասին հայտարարվեց այն բանից հետո, երբ նա հունիսի 5-ին քննադատեց իշխանությունների հակամաճարակային գործողությունները նշելով, որ այն տապալել են: Գ.Ծառուկյանը նշել էր, որ ձախողումներ են գրանցվել բոլոր ոլորտներում բարձրացնելով իշխանությունների 100 տոկոսի փոփոխության հարց:Հայտարարությունից հետո մամուլում շրջանառության մեջ դրվեց 1979թ Գագիկ Ծառուկյանին առնչվող խմբակային բռնաբարության գործի մասին նյութերը։
Հունիսի 14-ին Բարգավաճ Հայաստան կուսակցության ղեկավար Գագիկ Ծառուկյանի տանը վաղ առավոտյան խուզարկություն էր իրականացվել: Նույն օրը նա հրավիրվեց հարցաքննության՝ ՊԵԿ նախկին նախագահ Գագիկ Խաչատրյանի գործով։Հունիսի 15-ին ՀՀ գլխավոր դատախազ Արթուր Դավթյանը միջնորդություն էր ներկայացրել ԱԺ-ին՝ Գագիկ Ծառուկյանին պատգամավորական անձեռնմխելիությունից զրկելու և նրան ազատությունից զրկելու մասին։ Հունիսի 16-ին ԱԺ-ն կողմ է քվեարկեց միջնորդությանը՝ զրկելով Գագիկ Ծառուկյանին անձեռնմխելիությունից և թույլատրելով նրան ազատազրկել եւ նույն օրը Գագիկ Ծառուկյանն ԱԱԾ-ում մեղադրանք է առաջադրվել ընտրակաշառքի գործով՝ ՀՀ քրեական օրենսգրքի 38 -154.2-րդ հոդվածի 2-րդ մասի հատկանիշներով՝ ընտրակաշառք տալու համար ու քննիչը նրան կալանավորելու մասին միջնորդություն էր ներկայացրել դատարան։

Հեղինակ՝ Իզաբել Սահակյան

Աղբյուր` Փաստինֆո