Փաստ ինֆո

ՀՀ փոխվարչապետ Տիգրան Ավինյանը դեռևս 2018թ նոյեմբեր ամսին հայցադիմում էր ներկայացրել դատարան «Politik.am» լրատվականի դեմ՝ զրպարտության համար և պահանջել դրամական փոխհատուցում՝ 1 մլն դրամի չափով։ Հայցադիմումի պատճառը լրատվական կայքում հրապարակված «Փոխվարչապետ Ավինյանը մարիխուանա է օգտագործել կառավարությունում» և «Ավինյանը վախենում է.մարիխուանան փորձանք է բերել նրա գլխին» վերտառությամբ հրապարակումներն են։ 2019թ հուլիսի 3-ին Արարատի և Վայոց ձորի մարզերի ընդհանուր իրավասության դատարանը՝ դատավոր Գևորգ Բալյանի նախագահությամբ, մասնակի բավարարել է Ավինյանի հայցադիմումը՝ պարտավորեցնելով կայքի խմբագրին հերքում տեղադրել կայքում և հօգուտ Ավինյանի բռնագանձել 1 մլն դրամի չափով գումար, ինչպես նաև 24.000 ՀՀ դրամ՝ դատական ծախսերի համար։ Պատասխանող կողմը բողոքարկել է դատարանի որոշումը Վերաքննիչ քաղաքացիական դատարան, սակայն բողոքը մերժվել է և դատական ակտը մտել է ուժի մեջ»։

2020թ հուլիսի 31-ին Տիգրան Ավինյանը ֆեյսբուքյան իր էջում գրել է, որ դատարանը բավարարել է իր հայցը, իսկ որպես փոխհատուցում ստացված 1 մլն դրամի չափով գումարը փոխանցվել է ԵՊՀ Ժուռնալիստիկայի ֆակուլտետի մագիստրատուրայի բարձր առաջադիմությամբ աչքի ընկնող երկու ուսանողների ուսման վարձի վճարմանը:

«Politik.am» լրատվականի գլխավոր խմբագիր Բորիս Մուրազին «Փաստինֆո»-ին պատմեց, որ նախատեսված գումարը վճարվել է, սակայն դա չի եղել իր գումարը, ինքը ոչ նախաձեռնել է դրա վճարումը, ոչ էլ ինչ որ գումար է հավաքել, իսկ գումարը չէր պատրաստվում վճարել, քանի որ գտնում է, որ հայցում նշված գումարի մեծ չափը միտված էր այլ լրատվամիջոցներին վախեցնելու համար։

«Ես չէի վճարի, որ դա իրենց սպառնալիքները գործի դնելու միջոց չլիներ»,- ասաց Մուրազին՝ նշելով, որ հայցադիմումը նորմալ գործընթաց է, քանի որ մարդն ունի իրավունքներ, սակայն հարց է, թե ինչպես է անձը իրացրել իրավունքները։

Նրա խոսքով՝ դատարանը հիմք է ընդունել խիստ անհասկանալի ձևակերպումներ։

«Հիմք է ընդունել այն ձևակերպումը, որ մեր հրապարակումը վնասել է Ավինյանի հեղինակությանը, հատկապես նախընտրական շրջանում։ Իսկ 2018թ հոկտեմբերի 25-ին, երբ հրապարակել ենք դա, որևէ մեկը չի իմացել, թե երբ է տեղի ունենալու ընտրությունները։ Հոկտեմբերի 25-ը նախընտրական շրջան չի եղել և դատարանը դա պետք է հաշվի առներ։ Հասկանալի է, որ այդ որոշումը հիմնավորելու համար ինչ ցանկացել, խծկել են մեջը »,- ասաց Բորիս Մուրազին՝ նշելով, որ նման հիմնավորում կա նաև Մեսրոպ Պապիկյանի՝ իրենց դեմ ներկայացրած հայցով որոշման մեջ, մինդչեռ՝ Մեսրոպ Պապիկյանի դեպքում հրապարակումը եղել է 2019թ հունվարի 17-ին, այսինքն՝ հետընտրական շրջանում։ Բացի այդ, Բորիս Թամոյանը պատմեց, որ նախնական դատական նիստին հայտնել էին, որ հաջորդ դատական նիստին պատրաստվում են միջնորդություն ներկայացնել, որ Տիգրան Ավինյանը թեստ հանձնի՝ պարզելու վերջինիս օրգանիզմում թմրանյութերի առկայությունը, սակայն հայցվոր կողմը հաջորդ դատական նիստին խնդրել էր հետաձգել դատական նիստը՝ նշելով, որ գործին տեղյակ չէ։

«Ծիծաղելին այն է, որ իրենք հայցվոր կողմն են, այսինքն՝ իրենք իրենց ներկայացրած գործին տեղյակ չէին։ Հաջորդ դատական նիստը տեղի ունեցած մի քանի ամիս անց և անցավ այն ժամանակահատվածը, որը կենսաբանորեն մեզ ենթադրելու տեղիք էր տալիս, որ մարիխուանա օգտագործելու դեպքում կարող էինք ապացուցել դա»,-ասաց նա՝ հավելելով, որ 6-ամսյա ժամկետը լրանալուց հետո անիմաստ են համարել նման միջնորդություն ներկայացնելը, քանի որ այդ կերպ կհաստատվեր իրենց վարկածը։

Բացի այդ՝ նա նշեց, որ մարիխուանա օգտագործելու մասին հոդվածը հրապարակելուց առաջ հարցում են ուղարկել Տիգրան Ավինյանի աշխատակազմ, սակայն հարցման պատասխանը ստանալու փոխարեն իրեն զանգում է աշխատակազմի հետ կապ չունեց մարդ և խնդրում, որ չհրապարակվի այդ հոդվածը, ինչը մերժվել է։ Նրա խոսքով՝ դա ազդակ էր, որ տեղեկատվությունը հրապարակվի, քանի որ գրավոր հարցմանը պատասխանելու փոխարեն աշխատակազմից ինֆորմացիա է դուրս բերել։

Ինչ վերաբերում է հերքմանը, նա հայտնեց, որ տեղադրել են իրենց ուղարկած տեքստը, սակայն նշել են, որ այդ հերքում տարածում են, քանի որ դատարանի որոշմամբ ԴԱՀԿ-ն այդպես է պահանջում և չեն հերքել տեղեկատվությունը։

Աղբյուր` Փաստինֆո