Փաստ ինֆո

Առողջապահության նախարարը 3-4 շաբաթ առաջ հայտարարեց, որ մոտակա ժամանակներում ավելացնելու ենք թեստավորումը մինչև օրական 4000, որից 3000-ը պետպատվերով է լինելու։ Այսօր 1000-1300 թեստ է արվում և անհայտ է դրանից քանիսն է պետպատվեր, քանիսը՝ վճարովի։ «Փաստինֆո»-ի եթերում այս մասին ասաց համաճարակաբան Էդուարդ Հովհաննիսյանը։

«Ինչի՞ մասին է դա խոսում։ Թեստ չունենք, լաբորատորիաներ չունենք, իսկ հայկական թեստերն ի՞նչ եղան, եթե թեստ չունենք։ Ե՞րբ պետք է իրենք լինեին։ Իսկ եթե ռազմավարական այդպիսի մեծ սխալ է գործել, հույսը դրել է միայն հայկական թեստերի վրա և չի պատվիրել, չի գնվել այլ արտադրանքի թեստեր, փաստորեն մերկ ե՞նք ապագա համաճարակի զարգացման դեմ։ Դա բավականին լուրջ խնդիր է»,-ասաց Էդուարդ Հովհաննիսյանը։

Դիտարկմանը, որ Առողջապահության նախարարը հայտարարել է՝ Հայաստանը ոչ միայն պատրաստ է այս փուլում հաղթահարել համավարակի մարտահրավերը, այլև երկրորդ ալիքին է պատրաստ, համաճարակաբանը նկատեց՝ նախարարը խոսում էր մահճակալների մասին, իսկ ինքը՝ թեստավորման. «Այսօր 1300 թեստ է արվում, իսկ մեկ ամիս առաջ 2500 էր։ Այսօր էլ 2500 թող անեն, բոլոր կոնտակտավորներին փակեն և նրանք նոր մարդկանց չեն վարակի։ Այդ ընտանիքի շղթան կանգնելու է, չի շարունակվելու։ Մարդը վարակվում է, երեք օր հետո պարետատնից զանգում են ու ասում, որ պետք է մեկուսանաք։ Մարդ կա ընդհանրապես կոնտակտավորից հետո վարակվել, ապաքինվել է երկու-երեք շաբաթ հետո ու նրան զանգում են, ասում՝ կոնտակտավոր է։ Կոնտակտավորներով այդպես չեն զբաղվում։ Եթե այսպես շարունակենք, հոկտեմբերին պրոբլեմ ենք ունենալու»,-նշեց Էդուարդ Հովհաննիսյանը։

Աղբյուր` Փաստինֆո