Փաստ ինֆո

Քիչ առաջ ավարտվեց ԱԺ «Իմ քայլը» խմբակցության հանդիպումը Սահմանադրական դատարանի դատավորի թեկնածու Վահրամ Ավետսիյանի հետ։ Վերջինս ասաց, որ շուրջ 3 ժամ տևած քննարկման ժամանակ պատգամավորները հնչեցրեցին ինչպես մամուլի կողմից բարձրաձայնված բոլոր հարցերը, այնպես էլ այն հարցերը, որոնք լրատվամիջոցների կողմից չէին հնչել։

«Հնարավորինս անկեղծ ներկայացրեցի տրված հարցադրումների վերաբերյալ իմ վերաբերմունքը, մոտեցումները, որոնք իմ կարծիքով «Իմ քայլը» խմբակցության պատգամավորներին թույլ կտա ձևավորել մոտեցում հետագա գործընթացի վերաբերյալ»,-ասաց Վահրամ Ավետիսյանը։

Դիտարկմանը, որ իր հայրը եղել է Վճռաբեկ դատարանի քրեական պալատի նախագահ և Մարտի 1-ի տուժողների իրավահաջորդները մտահոգություններ ունեն այս մասով, Վահրամ Ավետիսյանն ասաց, որ այդ հարցը տարբեր ասպեկտներով քննարկվեց. «Ես ամենևին չեմ պատրաստվում արդարացնել նորանկախ ՀՀ-ում գոյություն ունեցած դատական համակարգի հետ առկա խնդիրները, նաև չեմ պատրաստվում դառնալ դատական համակարգի «մեղքերի քավության նոխազը»։ Իմ հոր հետ կապված հարցադրումների առումով նշեմ, որ այստեղ անհրաժեշտ է հստակ պարզել Վճռաբեկ դատարանի գործառույթները, թե ինչ գործառույթ է իրականացրել, արդյոք Վճռաբեկ դատարանը գործ քննող դատարան է, թե ոչ, արդյոք առկա են հստակ փաստեր, թե խոսում ենք միայն ենթադրությունների մասին։

Վճիռները բեկանվում են ի՞նչ հիմքով։ Այս տեսանկյունից հասկանում եմ նման հարցադրումներ անող սուբյեկտների մտահոգությունները, բայց չեմ կիսում այդ մտահոգությունները, որովհետև ներկայուսմ կան բազմաթիվ պաշտոնյաներ, որոնք այդ ժամանակահատվածում պաշտոնավարել են, առնչություն են ունեցել այդ գործերին»,-ասաց Վահրամ Ավետիսյանը՝ նշելով, որ իր հայրն արդեն հինգ տարի է, ինչ թոշակի է գնացել և չի պատկերացնում այդ պրոցեսների ազդեցությունը հետագայում ՍԴ-ում իր գործունեության վրա։

Աղբյուր` Փաստինֆո