Փաստ ինֆո

Գործարարից 100.000 ԱՄՆ դոլար շորթելու գործով դատաքննությունը Երեւանի ընդհանուր իրավասության դատարանի վարույթում քննվում է դռնփակ։ Այն գտնվում է ապացույցների հետազոտման փուլում եւ նախօրեին տեղի ունեցած դատական նիստում հարցաքննվել է տուժողը։

Մեղադրյալի պաշտպան  Ստեփանյանը «Փաստինֆո»-ի հետ զրույցում հայտնեց, որ շուրջ երեք դատական նիստ է, ինչ տուժող կողմն է ցուցմունք տալիս։ Պաշտպանի դիտարկմամբ՝ տուժողի նախաքննական և արդեն դատաքննության ընթացքում տված ցուցմունքներում որոշակի հակասություններ կան, ուստի պատրաստվում է միջնորդել՝ հրապարակել տուժողի նախաքննական ցուցմունքները։

Նախնական քննության տվյալներով՝ գյուղմթերքի արտահանմամբ զբաղվող գործարարից գումար են շորթել նրա իսկ մտերիմները՝ պահանջելով 100.000 դոլար՝ սպառնալով հակառակ պարագայում տարածել նրա եւ մտերմուհու միջեւ ինտիմ հարաբերությունների վերաբերյալ տվյալները։

Ստեփանյանի փոխանցմամբ՝ իր պաշտպանյալն իրեն առաջադրված մեղադրանքն ի սկզբանե չի ընդունել, առաջադրված մեղադրանքն էլ, ըստ նրա, աբսուրդի ժանրից է՝ հիմնված միայն տուժողի ցուցմունքի վրա։

«Այն, ինչ ասում է տուժողը, չգիտեմ, գուցե վրեժի շարժառիթից կամ այլ անձնական շահագրգռվածությունից ելնելով, որ իբրև թե փորձել են շորթման միջոցով իրենից գումար հափշտակել, սակայն իր ցուցմունքներով էլ հիմնավորվում է, որ նման բան չկա և չի էլ կարող լինել»,- ասաց պաշտպանը՝ նշելով, որ դռնփակ դատական նիստում քննարկվող տուժողի անձնական ընտանեկան կյանքին վերաբերող դրվագները չի կարող ներկայացնել, բայց կարծում է, որ դա է եղել վրեժխնդրության պատճառը կամ ինչ որ հարցի լուծման հասնելու ճանապարհը։

Արդեն շուրջ մեկ տարի է մեղադրյալը կալանքի տակ է, դատարանը գրավը թույլատրելի չի համարել նաեւ դատաքննության փուլում։ Ինչպես նշեց փաստաբանը՝ ներկայացված գրավի միջնորդություններով առաջարկել են բավականին մեծ գումարներ՝ մինչև 4-5 մլն դրամի չափով, սակայն դատարանը մի քանի անգամ մերժել է՝ ենթադրյալ խոչընդոտման ռիսկի պատճառաբանությամբ։

Պաշտպանը հայտնեց, որ պատրաստվում են խափանման միջոցի վերաբերյալ նոր միջնորդություններ ներկայացնել, քանի որ գործով վկաները շատ են և նման տեմպերով դատաքննությունը կարող է երկար տևել։

Մեր հարցին ի պատասխան փաստաբանը նշեց, որ դատակոչված են 5-6 վկա, սակայն ծավալի առումով նրանց հարցաքննությունը կարող է երկար տևել՝ հաշվի առնելով, որ միայն տուժողի հարցաքննությունը երեք դատական նիստ է շարունակվում է, բայց դեռևս չի ավարտվել։ Ինչ վերաբերում է գործի նյութերին, ապա Ստեփանյանը հայտնեց, որ դրանք 4-5 հատոր են՝ բաղկացած մոտ 1300 էջից։

Հեղինակ՝ Իզաբել Սահակյան

Աղբյուր` Փաստինֆո