Փաստ ինֆո

«Արաբկիրի թաղապետարանը տարածք չի տրամադրում Կասյան փողոցի սկզբնահատվածում գյուղմթերքների իրացման շուկա բացելու համար։ Մեզ ասում են ծրագիրն ավարտվել է և մենք տարածք տրամադրել չենք կարող։ Երկու օր առաջ դիմել էինք Կառավարությանը, մեզ տեղեկացրին, որ այսօր հարցին լուծում կտրվի, բայց մի շաբաթ անցել է, դեռ որևէ պատասխան չկա», - բողոքում են Կոմիտասի գյուղմթերքի շուկայի աշխատակիցները, որոնք իրենց բողոքով հիմա Կառավարության շենքի դիմաց են։ 

Նրանք Կառավարությունից պահանջում են հրատապ լուծում տալ արդեն օրեր շարունակ առկախված խնդրին։

«Վարչապետ ջան, մենք քեզ հետ ենք, մենք ջակցում ենք քեզ, բայց դու մեզ երկու տարի զրկել ես հացից,- ասում է Կառավարության դիմաց ակցիայի մասնակիցներից մեկը, - գյուղացին մթերքի իրացման խնդիր ունի։ Սա միակ շուկան էր, որտեղ գյուղացին քաղաքացու հետ անմիջական կապով, առաջին ձեռքից իրացնում էր գյուղմթերքը, ինչը երկու կողմից՝ և՛ գյուղացու, և՛ քաղաքացու համար շատ ձեռնտու տարբերակ էր։ Մեծ թվով հաճախորդներ ենք ունեցել, նույնիսկ հեռու վայրերից մեքենաներով գալիս էին առևտուր անելու, բոլորն էլ շատ գոհ էին մնում։ Մի խոսքով ասած՝ սա կայացած տոնավաճառ էր, որ հիմա, չես հասկանում ինչու, փակում են և չեն թողում որ դա աշխատի»։

Բողոքի ակցիայի մասնակիցները ցավով նշում են՝ արդեն իսկ զգալի վնասներ են կրել. «Բադրջանը տանում էինք բիրիկնոցներում չէինք կարողանում նույնիսկ 50 դրամով վաճառեինք, իսկ այտեղ միանգամից տանում էին, համ մենք էինք գոհ մնում, համ սպառողը։ Չենք հասկանում՝ ինչու են ուզում վնասեն գյուղացուն, չէ՞ որ սա մեր եկամատի աղբյուրի հիմնական սեզոնն է, դժվա՞ր է մի քանի օրով մեզ տարածք տրամադրելու հարցին արագ լուծում տալ, որ չտուժենք»։

Աղբյուր` Փաստինֆո