Փաստ ինֆո

«Լիդիան Արմենիա» ընկերության նախկին աշխատակիցները Կառավարության շենքի դիմաց բողոքի ակցիա են իրականացնում՝ պահանջելով վերականգնել աշխատելու իրենց իրավունքը։ Ակցիայի մասնակիցներից մեկը լրագրողներին հայտնեց, որ Գնդևազում կա 410 ընտրող, որոնցից 380-ը համաձայնություն են տվել հանքի շահագործման համար, իսկ մնացածը վախենում են տալ համաձայնություն, բոլորը վախենում են։

«Պարոն Փաշինյանն էլ եկավ մեզ մոտ, ասաց՝ հորդորում եմ, որ ճանապարհները բացեք, իրավական ոչ մի հիմք չկա փակելու, պետք է բացեք, իսկ հորդորներով ոչ ոք ճանապարհ չի բացի։ Այդ մարդիկ էլ երկու տարի այնտեղ նստած հայտնի չէ, թե ինչով են ապրում, մենք աշխատում ենք, չենք կարողանում հասցնել, իսկ նրանք ապրում են։ Այնպես չէ, որ 20 հոգով պետք է որոշեն Գնդևազի 80 տոկոս մարդկանց կյանքն ինչպես պետք է դասավորվի »,- ասաց նա՝ նշելով, որ 3 մլն-ի չափով պարտք ունի, իր երեխաներն ուսանողներ են և վարձերը չի կարողանում վճարել, բանկերում սև ցուցակում է և նոր ուսումնական տարում չի կարողանա վճարել, տուն վարձել։

Նրա խոսքով՝ բոլորը նույն վիճակում են, ընկերների մի մասը ՌԴ-ում է և չի կարողանում վերադառնալ, գյուղի 60 տոկոսն աշխատել են ընկերությունում և այժմ նույն վիճակում են։

Ինչ վերաբերում է Ամուլսարի պահապանների պնդումներին, որ քաղաքը և հարակից շրջանը պետք է զբոսաշրջային լինի, նա ասաց, որ ինքը ծանր տեխնիկայի վարորդ էր և, երբ նկատել են, որ մեքենայի ակից պետք է փոշի դուրս գա, անմիջապես եկել և փոշին վերացրել են։

«Պատճառ չկա, չեն ուզում և վերջ։ Պատճառն այն է, որ մարդիկ աշխատում են։ Երկու տարի այնտեղ կանգնած են, ինչո՞վ են ապրում։ Ես աշխատում եմ, չեմ հասցնում, իրենք ինչո՞վ են ապրում»,- ասաց նա։

Աղբյուր` Փաստինֆո